पल शाहलाई २ वर्ष ६ महिनाको जेल र २५ हजार रुपैयाँ जरिवाना

लेन्सनेपाल २०७९ भाद्र २२
पल शाहलाई २ वर्ष ६ महिनाको जेल र २५ हजार रुपैयाँ जरिवाना

अभिनेता पल शाहलाई नवलपुर जिल्ला अदालतले २ वर्ष ६ महिनाको जेल र २५ हजार रुपैयाँ जरिवानाको सजाय सुनाएको छ । यस्तै उनलाई पीडित बालिकालाई १० लाख रुपैयाँ क्षतिपूर्ति दिन आदेश जारी गरेको छ । 

मंगलवार यज्ञप्रसाद आचार्यको इजलासले शाहलाई जबर्जस्ती करणीको मुद्धामा सफाइ दिँदै बाल यौन दुरुपयोगको मुद्दामा उक्त सजाय सुनाएको हो । पीडित र जाहेरवालाले बयान फेरेका कारण पलले जबर्जस्ती करणीको मुद्धामा सफाइ पाएका हुन् । यद्यपी नवलपुर अदालतको आदेशमा असन्तुष्ट पलले  त्यसविरुद्ध उच्च अदालतमा जाने तयारी गरेका छन् ।

यस्तै पल शाहमाथि लागेको बलात्कारको मुद्दामाथिको सुनुवाइका लागि जिल्ला अदालत तनहुँले असोज २ गतेलाई पेसी तोकेको छ । अदालतका श्रेष्तेदार मीनबहादुर कुँवरले मुद्दामा असोज २ गते सुनुवाइ हुने जानकारी दिए ।

नाबालिगलाई बलात्कार गरेको आरोपमा पक्राउ परेर थुनामा रहेका अभिनेता शाहको मुद्दामा यसअघि १५ भदौमा सुनुवाई हुने भनिएको थियो । तर त्यस दिन न्यायाधीश केसी अनुपस्थित भएकाले सुनुवाइ हुन सकेन ।