‘परदेशी–२’को गीत ‘हिजो काम’ सार्वजनिक

लेन्सनेपाल २०८० असोज ३

नारायण रायमाझी निर्देशित चलचित्र ‘परदेशी–२’को गीत सार्वजनिक गरिएको छ । बडादशैंको असवर पारेर असोज २६ गतेबाट प्रदर्शनमा आउन लागेको चलचित्रको ‘हिजो काम’ बोलको गीत सार्वजनिक गरिएको हो । बुधवार सार्वजनिक गरिएको गीतमा सतिश चापागाईँको शब्द, चलचित्रका अभिनेतासमेत रहेका प्रशान्त तामाङको स्वर र बि.बि अनुरागीको संगीत रहेको छ ।

परदेशीकै कथा भनेको गीतमा केही मनछुने संवादसमेत गीतमा समावेश छन् । गीतमा चलचित्रका शीर्ष कलाकारहरु प्रकाश सपूत, दीलिप रायमाझीसँगै रमा थपलिया लगायतलाई प्रस्तुत गरिएको छ ।

नारायण इन्टरनेसनलको प्रस्तुतिमा राजेश बंशल र नारायण रायमाझीको संयुक्त निर्माण रहेको ‘परदेशी–२’मा प्रकाश, दीलिप र रमाका अलवा प्रशान्त तामाङ, केकी अधिकारी, वर्षा शिवाकोटी, नीर शाह, सबिन बास्तोता, देवेन्द्र बब्लु लगायतको अभिनय छ ।

गीतकार रमेश बिजीको लेखन रहेको चलचित्रले उच्च शिक्षाका लागि विदेशिने विद्यार्थीहरुको कथा पेस गर्छ । अध्ययनसँगै अन्य परिवेशमा परदेश पुगेकाहरुको कथा–व्यथालाई समेत चलचित्रमा समेटिएको छ । मानकृष्ण महर्जनको छायांकन, अष्ट महर्जनको द्धन्द्ध, रामजी लामिछाने र गोविन्द राईको कोरियोग्राफी रहेको चलचित्रलाई दीर्घ खड्काले सम्पादन गरेका हुन् ।