‘परदेशी–२’को पोष्टर सार्वजनिक

लेन्सनेपाल २०७८ फागुन २५

आगामी दशैंमा प्रदर्शन हुने चलचित्र ‘परदेशी–२’को पोष्टर सार्वजनिक गरिएको छ । नारायण रायमाझी निर्देशित चलचित्रको पोष्टर बुधबार सार्वजनिक गरिएको हो ।

पोष्टरमा चलचित्रका मुख्य कलाकारहरु दिलिप रायमाझी, केकी अधिकारी, प्रकाश सपुत, बर्षा सिवाकोटी र प्रशान्त तामङलाई प्रस्तुत गरिएको छ । पोष्टर हेर्दा केकी डाक्टर र प्रशान्त लाहुरेको भुमिकामा रहेको सहजै बुझ्न सकिन्छ । अध्ययनका लागि विदेशिने नेपाली विद्यार्थीहरुको कथामा चलचित्र बनेको जनाइएको छ । कथाको माग भन्दै नेपाल सहित अमेरिका र भारतको विभिन्न स्थानमा चलचित्रको छायाँकन गरिएको छ ।

रमेश बिजीको कथा रहेको चलचित्रलाई राजेश बंशल र नारायण रायमाझीले संयुक्त रुपमा निर्माण गरेका हुन् । त्यसो त २०७६ साल फागुन १० गते छायाँकनमा जाँदै गर्दा २०७७ को दशैंमा चलचित्र प्रदर्शन गर्ने बताइएको थियो । तर, कोरोना महामारीका कारण चलचित्रको छायाँकन बिचैमा रोकियो । लकडाउन खुले लगत्तै २०७८ को दशैंलाई प्रदर्शन मिति तय गरियो । यो वर्षपनि दशैंमा हल खुल्न सकेनन्, जसका कारण परदेशीको रिलिज थप एक वर्ष पछि धकेलिएको छ ।