‘परालको आगो’मा कालजयी गीत ‘उडिजाउं भने म पन्छी हैन’ समाबेश हुने

लेन्सनेपाल २०८२ जेष्ठ २१

निर्माणाधिन चलचित्र ‘परालको आगो’मा कालजयी गीत ‘उडिजाउं भने म पन्छी हैन’ समाबेश हुने भएको छ । निर्माण पक्षले संगीतकार शान्ति ठटालसँग अनुमति लिएको छ ।

सुशिल पोखरेलको निमार्णमा बन्न लागेको चलचित्र ‘परालको आगोमा’का लागि संगीतकार शान्ति ठटालसम्म उनको निवासमै पुगेर सम्झौता भएको हो । चार दशक अघि निर्माण भएको ‘परालकै आगो’को गीतलाई नयाँ चलचित्रमा पनि राख्नका लागि अनुमति लिएको निर्माता पोखरेलले बताए ।

शान्ति ठटालको संगीत रहेको गीतमा मनबहादुर मुखियाको शब्द र स्व।अरुणा लामाको स्वर रहेको छ । चलचित्रका लागि यो गीत नै चाहिने हुनाले श्रष्टा ठटालकै निवास भारतको सिलगुडी पुगी गीतका लागि अनुमती लिइएको निर्माता पोखरेलले बताए । उनका अनुसार दुवै पक्षबीच कागजी सम्झौता समेत भएको छ।

कथाकार गुरुप्रसाद मैनालीको कृतिमा आधारित ‘परालको आगो’मा जितु नेपाल, प्रकाश सपुत र सुहाना थापाले अभिनय गर्ने पक्कापक्की भइसकेको छ । लक्ष्मण सुनारको निर्देशनमा बन्न लागेको चलचित्र दशैंमा रिलिज हुने जनाइएको छ ।