४२ लाख माटोमा मिलेपनि चलचित्र ‘म’ पुनः निर्माण हुँदै

यसअघि ६० प्रतिशत छायाँकन गरि रोकिएको चलचित्र ‘म’ पुनः निर्माण गरिने भएको छ । निर्देशक र मुख्य भुमिकामा केही कलाकार परिवर्तन गर्दै कान्तिपुर फिल्म एकेडेमिले सोमबार दोस्रो पटक चलचित्रको शुभमुर्हत गरेको छ ।

यसअघि २०७६ साल साउन २० गते राजधानीमा एक कार्यक्रमको आयोजना गरि चलचित्रको औपचारिक घोषणा गरिएको थियो । सो समय भाद्र पहिलो साता बाट चलचित्रको छायाँकन गरिने जनाइएको थियो । तत्कालिन समयमा कान्तिपुर फिल्म एकेडेमीकै बिद्यार्थी रहेका परिच्छेद सेनको निर्देशनमा चलचित्रको छायाँकन पनि भएको थियो । ३५ दिन छायाँकन गर्दा करिब ६० प्रतिशत छायाँकन सकियो । तर, दशैका कारण चलचित्रको छायाँकन रोकियो । त्यतिबेला सम्म करिब ४२ लाख रुपैयाँ खर्च भइसकेको कान्तिपुरका सिइओ प्रकाश पुरी बताउँछन् । यसरी रोकिएको चलचित्रको पुनः छायाँकन भने हुन सकेन । ह्याम्स अस्पताल, मुत्तिनाथ बिकास बैंक, गोदावारीको एक घर लगायतका स्थानमा चलचित्रको छायाँकन गरिएको थियो । भाडामा लिएर छायाँकन गरिएको उक्त लोकेशनको लुक्स तथा पुर्वाधार नै केही समयमा परिवर्तन हुँदा चलचित्रको छायाँकन अघि बढाउन नसकिएको परिच्छेद र प्रकाश दुबैको भनाई छ । लोकेशनमा आएको परिवर्तनका कारण प्रस्तुतिमा कन्टिन्यूटि नदेखिने भएपछि चलचित्रको छायाँकन रोकियो । छायाँकन रोकिएको झण्डै ५ महिना पछि कोरोना संक्रमणका कारण नेपालमा लकडाउन भयो । निर्माण पक्षले लकडाउनका कारण चलचित्रको छायाँकन रोकिएको बहाना बनाउन थाल्यो । केही समयअघि टिभी फिल्मीको कार्यक्रम फिल्मी बहसमा पनि प्रकाशनले कोरोनाकै कारण आफ्नो चलचित्र रोकिएको बताएका थिए ।

त्यसो त चलचित्रको घोषणा गर्दै गर्दा केही कलाकार बाहेक आफ्नो एकेडेमीका बिद्यार्थीहरु कै संलग्नतामा चलचित्र निर्माण गर्ने बताइएको थियो । पहिलो चरणमा सोही अनुरुप काम पनि भयो । तर, यतिबेला भने बिद्यार्थीको काँधबाट सो जिम्मेबारी एकेडेमिक निर्देशकले लिएका छन् । अर्थात बिगतमा परिच्छेदको निर्देशनमा छायाँकन भएको चलचित्रको निर्देशनको जिम्मा अब सोही एकेडेमिका एकेडेमिक डिरेक्टर सुर्वण थापाले लिएका छन् । चलचित्रको लेखन एकेडेमिकै सिइओ प्रकाश पुरीको रहेको छ ।

तत्कालिन समयमा चलचित्रको घोषणा गर्दा परिच्छेदको डेब्यु निर्देशकिय फिचर फिल्म हुने बताइएको थियो । तर, यो चलचित्रको छायाँकन रोकिएपछि कोरोना कहरकै बिच उनले ‘प्रेमगञ्ज’ नामको चलचित्र निर्देशन गरे । यतिबेला उक्त चलचित्रको पोष्टप्रोडक्सनको काम भइरहेको छ । आखिर किन निर्देशक परिवर्तन गरियो त ? परिच्छेदले छोडे वा परिच्छेदलाई हटाइयो ? प्रकाश र परिच्छेद दुबैको एउटै कुरा छ – सहमतिमै निर्देशक परिवर्तन गरिएको हो । त्यसो त प्रकाशले शुभसाइतमा परिच्छेद पनि उपस्थित भइ शुभकामना दिएको बताए पनि परिच्छेदले निम्ता आएको तर आफु ‘प्रेमगञ्ज’को सम्पादनमा व्यस्त भएकोले उपस्थित हुन नसकेको जानकारि दिए । जे होस् परिच्छेद हाल ‘प्रेमगञ्ज’को काममा व्यस्त भएका कारण समय दिन नसक्ने भएपछि निर्देशकका रुपमा सुवर्ण भित्रिएको प्रकाशको भनाई छ ।

त्यसो त अब बिगतमा गरिएको छायाँकन सम्पूर्ण रुपले काम नलाग्ने भएको छ । कलाकार तथा प्राबिधिकको ३५ दिनको काम अनि निर्माताको ४२ लाख माटोमै मिलेको छ । निर्देशक र केही मुख्य कलाकारहरु परिवर्तन भएर मात्र होइन यसको कथा नै परिवर्तन भएकोले उक्त फुटेज काम नलाग्ने भएको बुझिएको छ । यद्यपी निर्माण पक्ष भने कथामा कुनै परिवर्तन नभएको जिकिर गर्छ । निर्माण पक्षले जे भनेपनि उक्त समय सुसाइट एटेम्प्ट गरेको एक व्यक्तिका बारेमा अर्को पात्रले इन्भेष्टिकेशन गर्ने कथामा चलचित्र निर्माण हुन लागेको जनाइएको थियो । यतिबेलाको कथा भने धनाढ्य परिवारका बाबु छोरा बिचको टसलको कथा भएको बताइएको छ । तर, प्रकाश भने कथा परिवर्तन नभएको बताउँछन् । उनले विगतमा मिडियामा आएको कथाको सार गलत भएको भन्दै अहिले जुन कथामा चलचित्र बनाउन लागिएको हो सोही कथामा नै पहिले चलचित्र बनाएको दाबी गर्छन । यद्यपी तत्कालिन निर्देशक परिच्छेद भने आफुले काम गरेको कथा सुसाइड एटेम्प्ट गरेको एक पात्रकै वरिपरिको भएको जनाउँछन् । प्रकाशले कोरोना पछि चलचित्रको टेष्ट नै फरक भएकोले पुनः निर्माण गर्न लागिएको भन्दै घुमाउरो शैलीमा चलचित्रमा केही परिवर्तन भएको संकेत गर्छन । निर्देशक सुवर्ण थापा भने चलचित्रले आफ्नो अस्तित्वको खोजीमा रहेका पात्रहरुको कथा भन्ने जनाउँछन् ।

त्यसो त पहिले छायाँकन हुँदा चलचित्रमा रेवती क्षेत्री, कुशुम गुरुङ, रेविका गरुङ, विजय लामा, सरिता लामिछाने, अनिल कँडेल, संजोग रसाइलीलगायतका कलाकारहरुको अभिनय रहेको थियो । जसमध्ये विजय र सरिता बाहेक अन्य कलाकारहरु कान्तिपुर फिल्म एकेडेमीमा अध्ययन गरेका तथा प्रशिक्षण लिएका विद्यार्थीहरु हुन । चलचित्रमा तेन्जिन पाल्देनको छायाँकन र जितेन लेप्चाको संगीत रहेको थियो । अब भने चलचित्रमा कान्तिपुरका बिद्यार्थी कम अन्य कलाकार ज्यादा देखिने भएका छन् । सोमबार दिइएको जानकारी अनुसार चलचित्रमा सरोज खनाल, सरिता लामिछाने, निशा अधिकारी, सविन श्रेष्ठ, निराजन प्रधान, रुविना थापा, प्रमोद अग्रहरी, संजोग रसाइली र पुनम श्रेष्ठलगायतका कलाकारहरुको अभिनय रहनेछ ।

त्यस्तै, बनिष शाहको सम्पादन, तेन्जिन पाल्देनको छायाँकन रहनेछ । कान्तिपुर फिल्म एकेडेमिले निर्माण गर्ने चलचित्रमा पदम पुरी सह निर्माता र विमला हुँमागाई निर्माता रहेका छन् । आगामी पुष ११ गतेबाट चलचित्रको छायाँकन आरम्भ गरिने जनाइएको छ ।
 

परिच्छेद र कान्तिपुर माथी प्रश्न ?

परिच्छेद छोटा चलचित्र निर्माणमा सफल मानिएका चलचित्रकर्मी हुन् । उनले निर्देशन गरेका छोटा चलचित्रले बिभिन्न फेस्टिवलहरुमा अवार्ड समेत जितेका छन् । तर, कारण जे भएपनि पहिलो पटक आफ्नो काधमा आएको फिचर फिल्मको क्याप्टेनसिप भने उनले निभाउन सकेनन् । चलचित्र पुरा नहुनुमा धेरै कारण होलान तर, नैतिक रुपमा टिम क्याप्टेनले त्यसको जिम्मेबारी लिनै पर्छ । यसअर्थ उनले आफुलाई प्रमाणित नगरेसम्म उनीमाथी यस्ता प्रश्न आउने नै छन् । अझ यो भन्दा पनि गहन प्रश्न त के भने चलचित्र क्षेत्रका लागि भावि उत्तराधिकारी अर्थात निर्देशक, लेखक, कलाकार, प्राबिधिक लगायत उत्पादन गर्ने थलोका रुपमा कान्तिपुर फिल्म एकेडेमीको स्थापना भएको हो । बिगतमा हाम्रो बिद्यार्थी भनेर गर्व गर्ने एकेडेमीले किन परिच्छेदकै नेतृत्वमा उक्त चलचित्र पुरा गर्न सकेन । यसबाट कान्तिपुरले कस्ता निर्देशक उत्पादन गर्छ ? उसले उत्पादन गर्ने निर्देशक माथी बिश्वास गर्ने कि नगर्ने ? चलचित्र निर्देशकको अभिव्यक्तीको माध्यम हो, यसअर्थ निर्देशककै विश्वासमा लाखौं रुपैयाँ लगानी हुन्छ । तर, कान्तिपुरले उत्पादन गरेका निर्देशकले त चलचित्र पुरा गर्न सकेनन्, लाखौं लगानी माटोमा मिल्यो, यस्ता सत्यहरुले कान्तिपुरको एकेडेमिक शैली प्रति पनि प्रश्नहरु उठिरहने छन् । जव सम्म सिइओ प्रकाश पुरी र एकेडेमिक निर्देशक सुवर्ण थापाले व्यवहारतः यस्ता प्रश्नको उत्तर दिदैनन् ।