‘गाउँ आएको बाटो’को प्रिमियरमा सहभागी हुन नेपाल आइपुगिन् संगीतकार हाइडी

लेन्सनेपाल २०८१ जेष्ठ २१

चलचित्र ‘गाउँ आएको बाटो’को नेपाल प्रिमियरमा सहभागी हुन संगीतकार हाइडी ली नेपाल आइपुगेकी छिन् । नवीन सुब्बा निर्देशित यो चलचित्रमा हाइडीले पार्श्व ध्वनीमा काम गरेकी छन् ।

चलचित्रको एउटा पार्श्व संगीतमा पनि हाइडी नै सिर्जना गरेकी हुन् । यसअघि उनी चलचित्रको गीतमा संगीत भर्न नेपाल आएकी थिइन् । चलचित्र गर्नुअघि उनी अनुसन्धानकै लागि पनि एक पटक नेपाल आएकी थिइन् । यो उनको तेस्रो नेपाल भ्रमण हो । हाइडीले राई सँस्कृतिको लय, धुनमाथि अध्ययन गर्दै परम्परागत र पश्चिमा संगीत मिसाउँदै चलचित्रको गीत तयार पारेकी छन् ।

चलचित्र छायांकन भएको स्थानबाटै पनि हाइडीले राई संगीतलाई बटुलेकी छन् । चलचित्रको कथा र भाव नियाल्दै आफूले फिल्ममा पार्श्व ध्वनी निर्माण गरेको पनि हाइडीको भनाई छ । उनी आफूले संगीत गरेको नेपाली चलचित्रको प्रतिक्रिया लिन उत्साहित छिन् ।

‘यो चलचित्र धेरै अन्तर्राष्ट्रिय चलचित्र महोत्सवमा देखायौं । यो चलचित्र जुन देशको यही देशमा अहिले प्रदर्शनको तयारीमा छ । म, यहाँका स्थानीय दर्शकसँग बसेर चलचित्र हेर्न निकै उत्साहित छु’, हाइडीले भनिन्, ’म नेपाली होइन । तर, पनि मैले नेपालको यस्तो चलचित्रमा संगीतदेखि पार्श्व ध्वनीमा काम गरें । मैले गरेका ती कामको प्रतिक्रिया बटुल्न पनि म उत्साहित छु ।’