दयाहाङ अभिनित ‘आप्पा’को गीत सार्वजनिक

लेन्सनेपाल २०७५ पौष ९

चलचित्र ‘आप्पा’को पहिलो गीत सार्वजनिक गरिएको छ । आप्पाको ‘हावा सरर’ बोलको गीतमा मुख्य पात्र दयाहाङ राईलाई प्रस्तुत गरिएको छ । गीतलाई नेपाल र इन्डियाको बोर्डर सन्दकफुमा छायाँकन गरिएको हो । गीतमा निर्देशक अनमोल गुरुङको संगीत, उमेश उपमाको शब्द रहेको गीतमा थुप्देन भुटिया र स्नेहाश्री थापाको स्वर छ ।

बाबु छोराको सम्बन्धको कथामा निर्माण भएको चलचित्रलाई अनमोल गुरुङले निर्देशन गरेका हुन् । निर्देशनमा यो अनमोलको डेब्यु चलचित्र हो । अ माउन्टेन स्टोरीज प्रोडक्सन र सिनेमा आर्टको संयुक्त ब्यानरमा निर्माण भएको चलचित्रका कार्यकारी निर्माता माबो हाङ रहेका हुन् भने रुदेन सादा लेप्चाको लगानी रहेको छ । चलचित्रमा दयाहाङ, सिद्धान्त र अल्लोनाका अलवा तुलसी घिमिरे, अरुणा कार्कीलगायतका कलाकारको समेत अभिनय रहेको छ ।

चलचित्रमा अनमोल गुरुङको कथा, अनमोल गुरुङ र उमेश उपमाको पटकथा तथा संवाद, शैलेन्द्र डि कार्कीको छायाँकन, अनमोल गुरुङ र शैकात देवको संगीत र निमेष श्रेष्ठको सम्पादन रहेको छ । अर्को वर्ष जेष्ठ २४ गतेलाई चलचित्रको प्रदर्शन मिति तोकिएको छ ।