कलाकार संघ बेलायत शाखा संयोजकमा रोमियन

लेन्सनेपाल २०७५ चैत्र १६

नेपाल चलचित्र कलाकार संघले बेलायतमा शाखा विस्तार गर्ने भएको छ । बेलायतमा रहेर नेपाली चलचित्र र कलाकारितामा सक्रिय अभिनेत्री रोमियन लिम्बूलाई संयोजकको जम्मेबारी तोकिएको छ ।

सानै देखि कलाकारितामा संलग्न रही आएकी रोमियनले चलचित्र नागबेलीको निर्माण समेत गरेकी छिन । संयोजकमा चुनिएपछि उनले बेलायतमा रहेका सम्पूर्ण कलाकारहरूलाई एकै छातामा गोलवन्द गराउने बताएकी छिन । बेलायतमा नेपाली कलाकारको उपस्थिति बाक्लो बन्दै गएको तर, संस्थागत हुन नसकेको भन्दै रोमियनले सबैको साझा थलोका रुपमा बेलायत शाखालाई विस्तार गर्ने जनाइन ।

हाल तदर्थ समिति गठन गर्दै गरेकी उनले नेपाल कलाकार संघको यही २३ गते हुने निर्वाचन पछि चयन हुने नेतृत्वसँग समन्वयन गर्दै अघि बढ्ने योजना रहेको सुनाइन । उनले आउने नेतृत्वको उपस्थितिका बिच बेलायतमा कलाकारको भेला आयोजनाको तयारी समेत गरेकी छिन । बेलायतमा नेपाली चलचित्र र चलचित्रकर्मीहरुलाई मर्यादित र सम्मानित बनाउन आफु लाग्ने उनको भनाई छ । उनले राजनीति मुक्त विशुद्ध कलाकारहरुको संस्थाका रुपमा बेलायत शाखालाई स्थापित गर्ने समेत जनाएकी छिन् । लिम्बुले एक दर्जन म्युजिक भिडियो र केही चलचित्रमा अभिनय गरेकी छिन ।