चलचित्र ‘नम्बरी सुन’को टिजर सार्वजनिक

लेन्सनेपाल २०८० आषाढ १

राजु गिरी निर्देशित चलचित्र ‘नम्बरी सुन’को टिजर सार्वजनिक गरिएको छ । २ मिनेट लामो चलचित्रको टिजरले ७० बर्ष पहिले नेपालमा हुने सुनको इतिहासलाई प्रस्तुत गरेको छ ।

आगामी भाद्र १ गतेबाट प्रदर्शन हुने चलचित्रको टिजरमा कलाकारद्वय गौरव पहारी र नम्रता सापकोटा बिचको प्रेम सम्बन्धमा आउने उतार चढावलाई मुख्य स्थान दिइएको छ । अभिनेता सरोज खनाल मुखियाको भुमिकामा देखिएका छन्, भने बुद्धि तामाङलाई श्रीमती पिडित श्रीमानको रुपमा देखाइएको छ । टिजरमा देखिने अभिनेता राजराम पौडेलको कमेडी पञ्च र किरण नेपालीको भिलेन अवतारले रोचक मोडमा पुर्याउने अनुमान गर्न सकिन्छ । नारायण खातीको शब्द, कथा तथा प्रस्तुति रहेको चलचित्रमा राजेन्द्र खड्गी, सविन बास्तोला, विनोद न्यौपाने, गीता अधिकारी लगायत कलाकारको अभिनय रहेको छ ।

सुवर्ण शिभान्स प्रोडक्सनको ब्यानरमा निर्माण भएको चलचित्रमा शिवम् अधिकारीको पटकथा तथा संवाद लेखन रहेको छ । चलचित्रमा सरोज खाती, सविन खाती र मनोज रिजालको लगानी छ ।