चौथो हप्तामा ‘ऊनको स्वीटर’, १० करोड बढीको ब्यापार गरेको दाबी

लेन्सनेपाल २०८२ जेष्ठ १६

चलचित्र ‘ऊनको स्वीटर’ प्रदर्शनको चौथो हप्तामा प्रवेश गरेको छ । चौथो हप्तामा प्रवेश गरिरहदा चलचित्रले देशभर १०० भन्दा बढी शो पाएको निर्माण पक्षले जनाएको छ ।

साथै निर्माण कम्पनी आर्टमाण्डू नेपालले चलचित्रले हालसम्म देशव्यापी रूपमा १० करोड ५ लाख रुपैयाँ ग्रस कलेक्सन गर्न सफल भएको जनाएको छ ।

नवीन चौहानको लेखन तथा निर्देशनमा बनेको चलचित्रले रिलिजको पहिलो दिनदेखि नै सकारात्मक प्रतिक्रियासहित दर्शकको साथ पाउँदै आएको छ । चलचित्रमा विपिन कार्की, मिरुना मगर, परीक्षा लिम्बु, एलेक्स पारस, विल्सन विक्रम राई, सुरज तमु, भावना खपाङ्गी मगर र सुनिल पोखरेलको अभिनय रहेको छ । समीक्षकदेखि सर्वसाधारण दर्शकसम्मबाट पाइरहेको प्रशंसा र सकारात्मक समीक्षाले गर्दा चलचित्रको चौथो सातासम्मको यात्रालाई उल्लेखनीय बनाएको हो ।

चलचित्रको ओभरसिज कलेक्सन भने सार्वजनिक गरिएको छैन । तर, विदेशमा पनि चलचित्रले लगातार राम्रो प्रदर्शन गरिरहेको छ । देशकै ठुलो मल्टिप्लेक्स चेन क्युएफएक्स सिनेमाजले व्यापारको आधारमा चलचित्रलाई यसअघि नै सुपरहिटको ट्याग दिइसकेको छ ।