बजेटमा समेटियो छायांकन स्टुडियो निर्माण, सिनेमा पर्यटन र ओटिटीको विषय

लेन्सनेपाल २०८२ जेष्ठ १५

सरकारले इन्डोर तथा आउटडोर चलचित्र छायांकन स्टुडियो निर्माणका लागि निजी क्षेत्रलाई प्रोत्साहन गर्ने भएको छ । आर्थिक वर्ष २०८२÷८३ को बजेट प्रस्तुत गर्दै अर्थमन्त्री विष्णु पौडेलले उक्त कुरा उल्लेख गरेका हुन् ।

अर्थमन्त्री पौडेलले बजेटमा भनेका छन् – ‘नेपाली मौलिक कला, संस्कृतिको प्रवद्र्वन र स्वदेशी विदेशी चलचित्रको छायाँकनलाई सहज बनाउन इन्डोर तथा आउटडोर स्टुडियो निर्माणका लागि नीजी क्षेत्रलाई प्रोत्साहित गरिनेछ ।’

यस्तै उनले पर्यटन प्रवर्धनको लागि चलचित्र पर्यटन प्रवर्धनमा जोड दिने समेत जनाएका छन् । बजेटमा सरकारले ओटीटी (ओभर द टप मिडिया सर्भिस) सेवालाई नियमन गर्न कानुन ल्याउने समेत उल्लेख गरिएको छ । बजेटमा भनिएको छ – ‘दूरसञ्चार तथा प्रसारण सेवामा विद्यमान ओटीटी सेवाको नियमन गर्न कानुनी व्यवस्था गरिनेछ ।’