‘हिजो आजका कुरा’को ट्रेलर सार्वजनिक

लेन्सनेपाल २०७९ भाद्र २२

चलचित्र ‘हिजो आजका कुरा’को ट्रेलर सार्वजनिक गरिएको छ । बुधवार राजधानीमा आयोजित पत्रकार सम्मेलनका बिच चलचित्रको ट्रेलर सार्वजनिक गरिएको हो ।

चलचित्रका कलाकार तथा प्राबिधिकहरुको उपस्थिति रहेको कार्यक्रममा ट्रेलर हेरेका सञ्चारकर्मीहरुले यसको प्रसंसा गरेका छन् । कलाकार तथा प्राबिधिकहरुले पारिवारिक कथाको चलचित्रले विगतमा टेलिभिजन रिरियलका रुपमा ‘हिजो आजका कुरा’ जसरी सफल थियो त्यसै गरि दर्शकको मन जितेर चलचित्र पनि सफल हुने विश्वास लिएका छन् । सार्वजनिक २ मिनेट ४५ सेकेन्डको ट्रेलरमा विदेश मोहले घर–परिवारमा पारेको असरलाई देखाइएको छ ।

करीब १८ वर्षसम्म नेपाल टेलिभिजनमा प्रशारण भएको सन्तोष पन्त र रमा थपलिया अभिनीत चर्चित टेलिसिरियल ‘हिजो आजका कुरा’को नाम सापटी लिएर चलचित्र निर्माण भएको हो । चलचित्रले काठमाडौंका चार परिवारको कथा भन्नेछ ।

चलचित्रमा सन्तोष पन्त, रमा थपलिया, केकी अधिकारी, दिव्य देव, साकार पन्त, ऋचा शर्मा, रीमा विश्वकर्मा, जेविका कार्की, रमेश अधिकारी, जयनन्द लामा, अनुष्का घिमिरे, विनायक कुइकेललगायतको अभिनय रहेको छ । असोज २८ गतेबाट प्रदर्शन हुन लागेको चलचित्रलाई साकार पन्तले निर्देशन गरेका हुन् ।