‘लण्डन टु पेरिस’ मा गरिमा शर्मा

दर्जनौं म्युजिक भिडियोमा अभिनय गरिसकेकी अभिनेत्री गरिमा शर्मालाई अब भने नेपाली फिल्ममा देख्न पाइने भएको छ । उनी नयाँ नेपाली फिल्म ‘लण्डन टु पेरिस’ मा अभिनेत्रीको रुपमा अनुबन्धित भएकी छिन् ।

एबी इन्टरनेश्नलको ब्यानरमा निर्माण हुने यो गरिमाको डेब्यू फिल्म हुनेछ । केही समयअघि नै निर्माण टिम तथा अभिनेत्री शर्माबीच लिखित सम्झौता भएको बताइन्छ । अभिनेत्री शर्माले ‘लण्डन टु पेरिस’ ले आफुलाई फिल्म क्षेत्रमा दरिलो प्रवेशको रुपमा उभ्याउने विश्वास व्यक्त गरेकी छन् । निर्माण टिमका अनुसार फिल्ममा गरिमाको महत्वपूर्ण भूमिका हुनेछ ।

आधुनिक प्रेमकथामा निर्माण हुने यो फिल्ममा यसअघि नै अभिनेत्री साम्राज्ञी राज्यलक्ष्मी शाह फाइनल भैसकेकी छन् । निर्माण टिमले दिएको जानकारी अनुसार फिल्मका मुख्य अभिनेतासमेत फाइनल भैसकेका छन् । चाँडै एक फर्स्टलुक पोस्टर सहित अभिनेता सार्वजनिक गर्ने तयारी निर्माण टिमको छ ।

घनश्याम लामिछानेको निर्देशनमा निर्माण हुने फिल्मका लागि पछिल्ला केही दिनयता कान्तिपुर फिल्म एकेडेमीमा वर्कसप चलिरहेको छ । निर्देशक लामिछानेले यसअघि धौली, अग्निदहन, पञ्चेबाजाजस्ता फिल्म निर्देशन गरिसकेका छन् । फिल्मको कथा, पटकथा तथा संवाद प्रदीप भारद्धाजले लेखेका हुन् । यही असारदेखि यो फिल्म फ्लोरमा जानेछ ।

अमित बस्नेत, अजित कुमार थापा, परी राना, अंकित गौतम, सनिश खकुरेल निर्माता रहेको फिल्मका सहनिर्माता अजित सिंह हुन् । एबी इन्टरनेशनलले निर्माण गरेको फिल्म ‘सम्हालिन्छ कहिले मन’ प्रदर्शनको तयारीमा छ भने यही टिमले अहिले बेलायतका विभिन्न सहरमा ‘हनी बनी’को छायांकन गरिरहेको छ ।