‘ऐरी’मा भुटानी अभिनेता सांगे अनुबन्धित

लेन्सनेपाल २०८१ बैशाख २०

चलचित्र ‘ऐरी’मा भुटानी अभिनेता सांगे सेल्ट्रिम अनुबन्धित भएका छन् । जीवन थापाको निर्देशन रहने चलचित्रका लागि उनले बुधबार कागजी सम्झौता गरेका छन् । चलचित्र खेल्ने विषयमा लिखित सम्झौता गर्न उनी मंगलबार काठमाडौं आएका थिए । बिहीबार बिहानै सांगे स्वदेश फर्किसकेका छन् ।

अभिनेता सांगेले चलचित्रको कथावस्तुले आफूलाई आकर्षित गरेका कारण काम गर्न राजी भएको प्रतिक्रिया दिएका छन् । उनले यो चलचित्रमा आफ्नो उपस्थितिले नेपाल र भुटानको सम्बन्धलाई अझै उचाइँमा लैजान सहयोग पुग्ने विश्वास लिए । भुटानी चलचित्र ‘सिंग्ये’बाट डेब्यु गरेका सांगेले बलिउड चलचित्र ‘राधे’र ‘जवान’मा काम गरेका छन् ।

चलचित्रको शिर्ष भुमिकामा यसअघि नै अभिनेता प्रदीप खड्का अनुबन्धित भइसकेका छन् । हिन्दी, नेपाली, अंग्रेजी र तमिल गरी चार भाषामा बन्न लागेको चलचित्रको यतिबेला प्रि–प्रोडक्सनको काम भइरहेको छ ।