यो वर्ष सर्वाधिक हेरिएको तीज गीत बन्यो ‘कोशेढुङ्गा’को ‘नत्र भने जीन्दगी ब्यर्थ छ’

लेन्सनेपाल २०८२ भाद्र १०

चलचित्र ‘कोशेढुङ्गा’मा समावेश ‘नत्र भने जीन्दगी ब्यर्थ छ’ यो वर्ष सर्वाधिक हेरिने तीज गीत बनेको छ । यो समाचार तयार पार्दा सम्म युट्युबमा ७४ लाख ८८ हजार भन्दा बढी पटक यो गीत हेरिएको छ भने टिकटकमा करोडौं भ्यूज पाएको छ । युट्युब भ्युजलाई मात्र हेर्दा पहिलो नम्बर मान्न नसकिए पनि टिकटकको भ्यूज हेर्दा ‘नत्र भने जीन्दगी ब्यर्थ छ’ नै सर्वाधिक हेरिएको गीत बन्न पुगेको छ ।

टिकटकमा यो गीत कयौं एकाउण्टबाट अपलोड भएको छ । आधिकारिक रुपमा सेभेन सिज इन्टरनेशनलले पनि थुप्रै भिडियोहरु पोष्ट गरेको छ । यद्यपी, ‘उनी छन् र पो गाजलुको अर्थ छ’ भन्ने अन्तराको एउटै भिडियोमा एक लाख २४ हजार भन्दा बढी भिडियो बनाइएको छ भने ‘उनी छन् र पो सिन्दुरको अर्थ छ’ भन्ने अन्तरामा ३७ हजार भन्दा बढी भिडियो बनाइएको छ । अन्य अकाउण्टबाट पोष्ट गरिएका भिडियो र त्यसमा बनाइएका भिडियोको संख्या पनि हजारौं देखिन्छ । टिकटकमा यि सबै भिडियोको भ्यूज करोडौं छ ।

चलन चल्तिको भाषामा भन्ने हो भने यो गीत भाइरल भएको छ । गीतमा खेम सेन्चुरीको संगीत, नेत्र अर्यालको शब्द तथा समीक्षा अधिकारी र दीपिका बयम्बु मगरको स्वर छ । नायिकाहरू सुरक्षा पन्त, ऋचा शर्मा र नीति शाहको नृत्य रहेको यो गीत तीजका पार्टी देखि दरखाने कार्यक्रमहरुमा समेत उत्तिकै घन्किएको छ । गायिका समिक्षा अधिकारी र संगीतकार खेम सेन्चुरीले देश विदेशका हजारौं दर्शक माझ स्टेजमा पनि पटक पटक यो गीत गाएका छन् ।

नेपाली चलचित्रको मार्केट ट्रेण्डलाई हेर्ने हो भने चलचित्र चलाउनका लागि पहिला गीत हिट गराउने पुरानै चलन हो । यसपटक पनि ‘नत्र भने जीन्दगी’ गीत हिट हुँदा यसको फाइदा बक्स अफिसमा देखिने अपेक्षा गरिएको छ । चलचित्रमा समावेश तीज गीत हिट भएको छ भने तीजकै छेकोमा चलचित्र रिलिज हुँदैछ । भाद्र १२ गते बिहिबार चलचित्र रिलिज हुँदैछ । चलचित्रका निर्माता किशोर अनुराग कथाको माग अनुसार नै चलचित्रमा तीज गीत समावेश गरिएको बताउँछन् । उनले चलचित्रमा तीजको गीत मात्र नभएर तीजको प्रसंग पनि समावेश भएको जनाए ।

‘कोशेढुङ्गा’लाई सर्वकालिन सफल चलचित्र ‘पूर्ण बहादुरको सारङ्गी’का निर्देशक सरोज पौडेलले निर्देशन गरेका हुन् । चलचित्रमा उनैक लेखन रहेको छ । यसअर्थ पनि चलचित्र प्रति दर्शकको अपेक्षा ज्यादा देखिन्छ । गाउँकी एउटी साधारण चुल्बुले केटीले जो साना कुराबाट डराउछे उसले जीवनमा आइपर्दा परिस्थितिहरुमा कस्ता ठूला निर्णय लिन सक्छे भन्ने विषय चलचित्रमा रहेको जनाइएको छ । आर्थिक अभाव, पारिवारिक कलह, दाम्पत्य जीवनका चुनौती, गाउँमै बसेर आत्मनिर्भर बन्न खोज्दा समाजले गर्ने व्यवहार जस्ता विषयहरु चलचित्रको ट्रेलरले देखाएको छ ।

नरदेवी फिल्मसको प्रस्तुति रहेको चलचित्रमा प्रेबिल कँडेल र किशोर अनुरागको लगानी रहेको छ भने कार्यकारी निर्मातामा दिनेश खड्का छन् । नेपाल रिलिजकै दिन प्याट्रिक सुवेदी र रमेश ढकालको सेभेन सिज इन्टरनेसनलले चलचित्रलाई ४२ भन्दा धेरै देशमा एकसाथ रिलिज गर्दैछ ।