‘मेयर’मा ११ हजारभन्दा धेरै क्राउड रहेको निर्देशकको दाबी

शुक्रबार छायांकन सकिएको चलचित्र ‘मेयर’को थप प्राबिधिक काम सुरु भएको छ । काठमाडौंको मल्ल होटेलबाट सुरु भएको चलचित्रको छायांकन सर्लाही र सिन्धुली गरि ५१ औं दिनमा सकिएको थियो । अधिकांश सिन सर्लाहीमा खिचिएको चलचित्रको केही सिनमात्रै सिन्धुली र काठमाडौंका खिचिएको निर्देशक दीपेन्द्र के खनालले जनाएका छन् ।

निर्देशक खनालले ‘मेयर’ आफ्ना लागि विशेष रहेको बताएका छन् । चलचित्रमा उल्लेख्य क्राउडको आवश्यकता भएको र क्राउडका बिच सोचेभन्दा पनि कम्फर्ट जोनमा रहेर चलचित्रका छायांकन भएको उनको भनाइ छ । एउटै सिन ११ हजारभन्दा धेरै क्राउड जम्मा गरेर छायांकन भएको उनले बताए । नेपाली चलचित्र कै इतिहासमा ठूलो क्राउडमा आफूले चलचित्र खिच्ने अवसर पाएको उनको दाबी छ । पर्दामा ‘मेयर’ कति भव्य देखिन्छ त्यसले अहिले आफूले भनेको कुरा प्रमाणित गर्ने भन्दै उनी भन्छन्, ‘मैले बनाएको भनेर म दाबी गरिरहेको छैन । यो नेपाली राजनीतिक चलचित्रको इतिहासमा नेपालमै ट्रनिङ पोइन्ट हुनेछ ।’ उनी भन्छन् –  ‘नगरपालिका र स्थानीयको सहयोगमा यो सम्भव भएको हो । यसले चलचित्रको प्रोडक्सनलाई रिच बनाएको छ । यसको सकारात्मक प्रभाव चलचित्रमा देखिनेछ । यसले चलचित्रलाई भव्य त देखाउने नै छ, यसले थप विश्वस्नीय पनि बनाउनेछ ।’

दर्शकले नेपाली चलचित्रमा पहिलो पटक राजनीतिक चलचित्रको फिल गर्न पाउने निर्देशक खनालको भनाइ छ । ठूलो मास हुनबित्तिकै राजनीतिक चलचित्र को रंग नै अर्कै हुने उनले बताए । जनतासँग चलचित्रलाई जोड्न पनि छायांकनमा क्राउड उत्तिकै जरुरी रहेको निर्देशक खनाल बताउँछन् ।

चलचित्रको मुख्य भूमिकामा खगेन्द्र लामिछाने छन् । जसलाई चलचित्रमा दर्शकले मेयरको भूमिकामा देख्न पाउनेछन् । चलचित्रमा खगेन्द्रसँगै वर्षा राउत, अर्पण थापा, अनुप बराल, दिव्यदेव, प्रकाश घिमिरे, हरिहर शर्मा, ऋचा शर्मा, रवीन्द्र झा, रमेश बुढाथोकी, अर्विशा थापा, सञ्जोग रसाइली, आशान्त शर्मा, प्रभाकर न्यौपाने, झकेन बिसीलगायतको अभिनय छ ।

यो चलचित्रबाट निर्माताको रूपमा श्रृष्टिमाँ खनाल र कलाकारको रूपमा अर्विशा थापाले डेब्यू गरेका छन् । चलचित्र ‘मेयर’को कथा सर्लाही जिल्ला, वाग्मती नगरपालिकाका वर्तमान मेयर भरत थापाको जीवन संघर्षलाई आधार मानेर तयार पारिएको छ । चलचित्रको कार्यकारी निर्माता दीपेन्द्र स्वयं हुन् भने निर्माता शर्मिला पाण्डे र श्रृष्टिमाँ खनाल हुन् । पटकथा महेश दवाडीले लेखेका छन् ।