‘माइतीघर’को शीर्ष गीत सार्वजनिक, आकर्षक कोरियोग्राफी

चलचित्र ‘माइतीघर’को शीर्ष गीत ‘बसन्त नै बस्न खोज्छ यहाँ लोलाएर’ सार्वजनिक गरिएको छ । ओएसआर डिजिटलबाट बिहीबार सार्वजनिक गरिएको गीतमा सञ्जिवनीको स्वर, किरण खरेलको शब्द, स्वर्गीय जयदेवको सङ्गीत छ । 

गीतको ओर्जिनल भर्सनमा गायिका आशा भोस्लेको स्वर समावेश थियो । निजि क्षेत्रको पहिलो चलचित्र ‘माइतीघर’ समावेश बहुचर्चित गीत रि–रिकर्ड गरेर यो चलचित्रमा समावेश गरिएको हो ।

कविराज गहतराजको कोरियोग्राफी रहेको गीतको भिडियोमा नायिकाद्धय उपासना सिंह ठकुरी र श्यामाश्री शेर्पाले नृत्य गरेका छन् । भिडियोको कोरियोग्राफी लोभलाग्दो छ । लोकेसन र छायाङ्कनपक्षले पनि दर्शकलाई आकर्षित गर्ने देखिन्छ । गीतलाई उत्कृष्ट बनाउन निर्माण पक्षले कुनै कसुर बाँकी नराखेको देखिन्छ ।

असोज १३ गते दसैँको फूलपातीबाट रिलिज हुने चलचित्र रोहित अधिकारी फिल्मस् प्रा.लि.को ब्यानरमा निर्माण भएको हो । रोहित अधिकारीको प्रस्तुति रहेको चलचित्रका निर्माता रबिन शेरचन र धिरज तामाङ हुने भने ईश्वर श्रेष्ठ र निरज कटुवाल कार्यकारी निर्माता हुन् ।

मिलन तामाङको निर्देशन रहेको चलचित्रमा चन्द्रकुमार दोङको कथा, रामशरण पाठकको पटकथा तथा सम्बाद, मानकृष्ण महर्जन र सुशन प्रजापतिको छायाङ्कन र सुरेन्द्र पौडेलको सम्पादन छ ।

चलचित्रमा केदार प्रसाद घिमिरे, धिरज मगर, प्रकाश सपुत, उपासना सिंह ठकुरी, श्यामाश्री शेर्पा, युवराज लामा, वुद्धि तामाङ, शिशिर वाङ्देल, रजनी गुरुङ, सन्तोष शाही, फूलकुमार बमजम, संगीता थापा लगायतका कलाकारहरूको अभिनय छ ।

यसअघि नै निर्माता mअधिकारीले गीतको भिडियो प्रतियोगिताको समेत घोषणा गरिसकेका छन् । यो गीतमा ४० सेकेन्डदेखि २ मिनेटसम्मको भिडियो बनाउनेमध्ये एक जना उत्कृष्ट दर्शकलाई ५ लाख नगद पुरस्कार दिने घोषणा गरिएको छ ।

Maitighar

Know more about Nepali Movie 'Maitighar'

यो पनि पढ्नुहोस्
५ लाख पुरस्कार सहित ‘माइतीघर’को नृत्य प्रतियोगिता घोषणा