एकसाथ ४० देशमा प्रदर्शन हुँदै चलचित्र ‘कोशेढुंगा’

लेन्सनेपाल २०८२ आषाढ ११

सम्भवत् पहिलो पटक कुनै नेपाली चलचित्र एकसाथ ४० भन्दा धेरै देशमा प्रदर्शन हुने भएको छ । सेभेन सिज इन्टरनेसनलले चलचित्र ‘कोशेढुंगा’लाई नेपालसहित ४० भन्दा धेरै देशमा एकसाथ रिलिज गर्न लागेको हो ।

चलचित्र भदौ १२ गते एकसाथ विश्वभर प्रदर्शन हुने सेभेन सिजका प्याट्रिक सुवेदी र रमेश ढकालले जनाएका छन् । सर्वकालीन ब्लकबस्टर चलचित्र ‘पूर्ण बहादुरको सारङ्गी’ फेम्ड निर्देशक सरोज पौडेलको निर्देशन रहेको चलचित्र नेपालसँगै अमेरिका, अस्ट्रेलिया, जापान, युके, क्यानडालगायतका देशमा रिलिज हुनेछ ।

स्याङ्जाको आधिखोला, त्रिवेणी र सिरुवारी क्षेत्रमा छायाँकन गरिनुका साथै चलचित्रका केही दृष्यहरु काठमाडौंमा सेट लगाएर छायाँकन गरिएको छ । नरदेवी फिल्मसको प्रस्तुति रहेको चलचित्रमा अभिनेत्री सुरक्षा पन्त, आर्यन सिक्देल, ऋचा शर्मा, मन्जिल कुमार, नीति शाह, प्रवीण खतिवडा, हिउवाला गौतम, सरोज खनाल, विशाल पहाडी, दिनेश काफ्ले, लोकमणि सापकोटालगायतको अभिनय छ ।

चलचित्रको निर्मातामा प्रेविल कँडेल र किशोर अनुराग हुन् भने कार्यकारी निर्माता दिनेश खड्का हुन् । चलचित्रमा बाबु श्रेष्ठको छायांकन, नहकुल खड्काको सम्पादन र आशिष अविरल र रिदम कँडेलको संगीत छ ।