‘जेरी अन टप’को गीत ‘कस्तुरी’ सार्वजनिक

लेन्सनेपाल २०८२ असोज ६

चलचित्र ‘जेरी अन टप’को पहिलो गीत ‘कस्तुरी’ सार्वजनिक गरिएको छ । सोमबार घटस्थापनाको दिन पारेर सार्वजनिक गीत रोमान्टिक भावको छ । मुस्ताङ र भारतको राजस्थानमा छायाँकन गरिएको गीतमा चलचित्रको मुख्य जोडी अनमोल केसी र आँचल शर्मालाई प्रस्तुत गरिएको छ ।

गीतमा आशिष गुवाजु र सदिक्षा कट्टेलको स्वर छ भने जयन जे वाइबाको शब्द तथा संगीत छ । वाइबाकै साउण्ड डिजाइन रहेको गीतमा अशोक थानेतको मिक्सिङ र मास्टरिङ छ ।

असोज ३१ गतेबाट प्रदर्शनमा आउने चलचित्रलाई सुयोग गुरुङले निर्देशन गरेका हुन् । चलचित्रमा अनमोल र आँचलसहित जसिता गुरुङ, केदार घिमिरे (माग्ने बुढा), भुवन केसी, उषा खड्गी लगायतको पनि अभिनय रहेको छ । चलचित्रमा सुरक्षा पन्तले विशेष भूमिका निभाएकी छन् ।

अनन्या फिल्मस्को ब्इानरमा निर्माण भएको चलचित्रका प्रस्तुतकर्ता सरोज न्यौपाने हुन् । रोविन शेरचन, रामकृष्ण श्रेष्ठ, दीपक भण्डारी र अनन्या न्यौपाने चलचित्रका निर्माता हुन् । अनुराधा गिरी र इश्वर श्रेष्ठ कार्यकारी निर्माता रहेको चलचित्रका एसोसिएट निर्मातामा नविन घिमिरे, विवेक थापा र भविष्य खड्का हुन् । चलचित्रमा हेमराज बिसीको कथा, विश्वास तिम्सिनाको पटकथा, दुलिप रेग्मीको छायांकन, जयन जे वाइबा, कालिप्रसाद बाँस्कोटा, जोहन चाम्लिङ राई र व्रिजेश श्रेष्ठको संगीत छ ।