‘आ बाट आमा’बाट डेब्यु गर्दै साइग्रेस, संगीतकारमा थानेश्वर

लेन्सनेपाल २०८२ भाद्र ४

कथा बाचकका रुपमा चर्चामा आएका साइग्रेस पोखरेलले चलचित्रमा डेब्यु गर्ने भएका छन् । केही म्युजिक भिडियोमा समेत अभिनय गरेका पोखरेलले चन्द्र पन्तको निर्देशन रहने चलचित्र ‘आ बाट आमा’बाट ठुलो पर्दामा डेब्यु गर्न लागेका हुन् ।

आर्या इन्टरटेन्मेन्टको ब्यानरमा निर्माण हुने चलचित्रमा पोखरेललाई अनुबन्ध गर्दै कलाकारको लाइनअप पुरा भएको जनाइएको छ । यस्तै निर्माण टिमले संगीतमा थानेश्वर गौतमलाई अनुबन्धित गरेको छ । पछिल्लो समय चलचित्र ‘एन्जिला’को गीत हिट भएपछि थानेश्वर पनि चलचित्र संगीतमा व्यस्त हुन् थालेका छन् ।

निर्देशक पन्तकै कथा तथा पटकथा रहेको चलचित्रको छायाँकन भदौ १२ गतेबाट शुरु हुने जनाइएको छ । चलचित्रमा यसअघि नै कलाकारहरु उषा उप्रेती, पल शाह, विपना थापा, दक्षिण भारतीय अभिनेता प्रदीप रावत लगायत अनुबन्धित भइसकेका छन् ।

चलचित्रमा कृष्ण प्रसाद सुवेदी, ध्रुव न्यौपाने र प्रकाश कुँवरको लगानी रहने छ । चलचित्रमा कार्यकारी निर्मातामा करण सिंह हुन् भने सह निर्मातामा क्षितिज ढुङ्गाना रहेका छन् । आगामी वर्षको फागुन १५ गतेलाई चलचित्रको रिलिज तोकिएको छ ।