‘पुजार सार्की’को वर्कशप सुरु, आर्यन, प्रदिप र पल सहभागी

लेन्सनेपाल २०८० पौष २२

राष्ट्रिय चलचित्र पुरस्कार बिजेता निर्देशक दिनेश राउतले निर्देशन गर्न लागेको चलचित्र ‘पुजार सार्की’को वर्कशप सुरु भएको छ । राजधानीमा जारी वर्कशपमा चलचित्रका सबै मुख्य कलाकारहरु सहभागी छन् ।

माघको दोस्रो साताबाट छायाँकनमा जाने चलचित्रको छायांकन सुरु हुन भन्दा केही साता अगाडि वर्कशप सुरु भएको हो । वर्कशपमा मुख्य तीन नायकहरू आर्यन सिग्देल, प्रदीप खड्का र पल शाहका साथै मुख्य नायिकाहरू अन्जना बराइली र परीक्षा लिम्बु सहभागी छन् ।

वास्तविक जीवनबाट प्रभावित रहने यस चलचित्रलाई विकास सुवेदीले लेखेका हुन् । बिकासले आफ्नो पहिलो चलचित्र ‘प्रकाश’बाट उत्कृष्ट लेखनका लागि थुप्रै अवार्डहरु समेत प्राप्त गरेका छन् । संगीतकार सुभाष भुसालले यसै चलचित्रबाट निर्माणमा समेत हात हालेका छन् । बिग बजेको यो चलचित्र निर्देशक, लेखक र स्टारकास्टका कारण घोषणा देखि नै चर्चामा छ ।