‘नेपाली कलाकार हुनुमा गर्व गर्छु’ – प्रदीप रावत

लेन्सनेपाल २०८१ मंसिर ३

फिल्म ‘ह्रस्व दीर्घ’को प्रवर्द्धनका लागि नेपाल आएका भारतीय कलाकार प्रदीप रावतले सोमबार दर्शकसँग साक्षात्कार गरेका छन् । कमलपोखरीस्थित बिग मुभिजमा हल भित्रै गएर उनले दर्शकसँग प्रतिक्रिया लिए । हाउसफुल रहेको हलमा उनको प्रवेश हुँदा दर्शकहरुले हुटिङ गर्दै प्रेम दर्शाएका थिए । उनीसँग हलमा फोटो खिच्न दर्शकहरुबीच हानाथाप चलेको थियो ।

हाउसफुल हलमा उनको प्रवेशले माहौल झनै उत्साहपूर्ण बनायो । दर्शकहरूले हुटिङ गर्दै प्रेम व्यक्त गर्दा प्रदीप प्रसन्न मुद्रामा देखिए । उनले दर्शकसँग संवाद गर्दै भने, ‘तपाईँहरूको माया पाउन म नेपाल आएको हुँ । तपाईँहरूको साथले मलाई प्रेरणा दिन्छ ।’

हलभित्र दर्शकसँग साक्षात्कार गरेपछि उनले सञ्चारकर्मीहरुसँग कुराकानी गर्दै फिल्म राम्रो चलेको देख्दा खुसी लागेको बताए । उनले निर्माताको मिहिनेत र त्यागलाई पशुपतिनाथले आशीर्वाद दिएको बताए । उनलाई पत्रकारले नेपाली चलचित्रको कलाकार हुँदाको अनुभवबारे पनि प्रश्न सोधेका थिए । जसको जवाफमा उनले भने – ‘म नेपाली कलाकार हुनुमा गर्व गर्छु । म पहाडी हुँ । नेपाल पनि पहाड नै छ । यसैले हाम्रो डीएनए मिल्छ । अलिअलि मेरो अनुहार पनि नेपालीसँग मिल्छ । मलाई नेपाली कलाकार बनाइदिनुभएकोमा आभारी छु ।’ उनले भोलिका दिनमा पनि नेपाली फिल्म खेल्न चाहने बताए ।