नेपाल अगावै जापानमा रिलिज हुँदै ‘निरमाया’

लेन्सनेपाल २०८० बैशाख ६

चलचित्र ‘निरमाया’को प्रदर्शन जापानबाट शुरु हुने भएको छ । नेपाल रिलिज अगावै यही अप्रिल २९ तारिखमा जापानको टोकियोको शिनओकुबो स्थित सोलमारी मुराहलमा चलचित्र प्रदर्शन हुँनेछ ।

जातीय छुवाछुत बिरुद्धको अभियानका रुपमा निर्माण गरिएको भनिएको यस चलचित्रलाई एनोदर चान्स नेपालको प्रस्तुति तथा एनआरएनए जापान र अन्तर्राष्ट्रिय नेपाली साहित्य समाज जापान च्याप्टरको आयोजनामा जापानमा विशेष प्रदर्शनी हुन लागेको हो ।

पदम विश्वकर्मा साहित्य प्रतिष्ठानको सहकार्यमा मदानी मुभि एन्ड इन्टरटेन्मेन्टको ब्यानरमा निर्माण भएको चलचित्रको जापान राइट्स एनोदर चान्स नेपालले खरिद गरेको छ । प्रस्तुतकर्ता अनन्त तिमल्सिनाका अनुसार जापानका बिभिन्न शहरहरुका साथै अन्य देशमा पनि चलचित्र प्रदर्शन पछि मात्र नेपालमा रिलिज हुनेछ ।

रमेश कोइरालाले निर्देशन गरेको चलचित्रमा रमेश बुढाथोकी, लय संग्रौला, जेएन घिमिरे, जेबी डीसी, अजित लामिछाने, प्रतिशा रिजाल, समृद्धि पौडेल, रमेश अधिकारी, गोपाल ढकाल, रामबाबु रेग्मी लगायतको अभिनय रहेको छ ।