राजेश हमालले खेल्ने ‘नरसिंहाः अवतार’ निर्माणको घोषणा

महानायक राजेश हमालको अभिनय रहने चलचित्र ‘नरसिंहाः अवतार’ निर्माणको घोषणा गरिएको छ । थिम पोस्टर सार्वजनिक गर्दै चलचित्र निर्माणको घोषणा गरिएको हो ।

रातो र निलो रङ प्रयोग गरिएको पोस्टरले युद्धको सङ्केत गरेको छ । नरसिंहाको अर्थ भगवान विष्णुको उग्र अवतार हो । नरसिंह रूप यो दश अवतार मध्ये चौथो अवतार हो । नरसिंह नामका अनुसार यस अवतारमा भगवानको आधा पुरुषको र आधा शरीर सिंहको धारण गरेका थिए । दैत्य हिरण्यकश्यपले भगवानसँग तपस्या गरेका थिए र चलाखीपूर्वक वरदान मागेका थिए । त्यसपछि सबै देवताहरूले शिवको शरण लिए र नरसिंहको क्रोध शान्त गर्ने कुरा गर्न थाले । नरसिंहको क्रोध शान्त गर्न शिवले सर्वेश्वरको अवतार लिनु परेको थियो । दुवैबीच १८ दिनसम्म युद्ध चल्यो र १८औँ दिनमा भगवान नरसिंहले थाकेर आफ्नो प्राण त्याग गरेका थिए ।

शान्तिका लागि द्वन्द्व हुने थिम पोस्टरले संकेत गरेको यसले पनि चलचित्र द्वन्द्वप्रधान हुने प्रष्ट छ । आगो र पानीले आफ्नो अस्तित्व एकै ठाउँमा रहेर जोगाउन सक्दैनन् । त्यसैले यो लगाईंमा कसले जित्छ भन्ने हो । त्यसैले यसमा भरपुर एक्सन हुने अनुमान लगाउन सकिन्छ ।

दिवाकर भट्टराईले निर्देशन गर्न लागेको यही चलचित्रबाट महानायक हमालले कमब्याक गर्दै छन् ।  महानायक हमाल लामो समयको ब्रेकपछि फिचर चलचित्रमा अभिनय गर्ने निर्णयमा पुगेका हुन् ।

क्रिएटिभ सिने आर्टको प्रस्तुति रहने चलचित्रको जानरा खुलाइए पनि निर्माणपक्षले कथाबारे केही जानकारी गराएको छैन । हमालको अपोजिटमा नायिका को हो, अन्य मुख्य कलाकार को–को हुन्, निर्माता को हो भन्नेबारे पनि निर्देशकले केही खुलाएका छैनन् । थिम पोस्टर पनि यसमा मौन छ । चलचित्रको लगानी भने तीन करोडभन्दा माथि हुने बताइएको छ ।