‘मालती मंगले’को वर्कशपमा जुटे विजय र वर्षासहितका कलाकार

चलचित्र ‘मालती मंगले’को कार्यशाला शुरु भएको छ । काठमाडौंमा जारी वर्कसपमा अभिनेता विजय बराल, अभिनेत्री वर्षा राउत, सुवर्ण थापा, मेक्सम गौडेल, प्रकाश घिमिरे, सरिता गिरी, सुस्मा निरौलालगायत कलाकारहरू सहभागी रहेका छन् ।

चलचित्रका पटकथा तथा संवाद लेखक संयोग गुरागाईँको संयोजनमा वर्कसप सञ्चालन भइरहेको हो । वर्कसपको क्रममा अभिनेता विजय बरालले चलचित्रले नेपाली समाजको यथार्थ जीवनका कथालाई रोचक तरिकाले प्रस्तुत गर्ने विश्वास व्यक्त गरे । त्यसै गरी अभिनेत्री वर्षा राउतले वर्कसपलाई आफूलाई पात्रमा ढाल्ने अवसरका रूपमा लिएको बताइन् ।

भाद्र दोस्रो हप्तादेखि छायाङ्कनमा जाने तयारीमा रहेको चलचित्रलाई प्रकु पाण्डेयले निर्देशन गर्नेछन् । कथा पाण्डेय स्वयंले लेखेका हुन् भने पटकथा तथा संवाद गुरागाईँले तयार पारेका छन् । चलचित्रको छायाङ्कन तनहुँ र स्याङ्जा जिल्लाका विभिन्न भूभागमा हुने कार्यकारी निर्माता सागर ज्ञवालीले जानकारी दिए ।

रानी म्युजिक इन्टरनेशनल प्रा।लि।को ब्यानर र युनी इन्टरटेनमेन्टको सहकार्यमा निर्माण हुने चलचित्रका निर्माता लोकप्रिय गायक रामकृष्ण ढकाल हुन् । सह निर्माता रविन श्रेष्ठ र बाबु सुवेदी, छायाङ्कन निर्देशक महेश पौडेल, सम्पादक रोमी तण्डुकार, रङ्ग संयोजक कृष्ण भण्डारी, गीतकारहरू राजेन्द्र थापा, आनन्द अधिकारी, गोपाल अधिकारी र सङ्गीतकारहरू हरि लम्साल, राजनराज सिवाकोटी, उज्ज्वल सागर रहेका छन् । निर्देशक पाण्डेयका अनुसार ‘मालती मंगले’ पारिवारिक प्रेमकथामा आधारित चलचित्र हुनेछ।