इलामबाट शुरु भयो ‘मैझारो’ छायाँकन

लेन्सनेपाल २०८२ श्रावन २

चलचित्र ‘मैझारो’को छायांकन शुरु गरिएको छ । साउने सक्रान्तिको अवसर पारि नेपालको पूर्वी पहाडी जिल्ला इलामबाट चलचित्रको छायाँकन शुरु गरिएको हो ।

‘तक्मेबुढा’ नामबाट चर्चित अभिनेता विल्सन विक्रम राईले चलचित्रको निर्देशन गर्दैछन् । उनकै कम्पनी ‘तक्मे प्रोडक्सन’को ब्यानरमा चलचित्र निर्माण हुने छ ।

चलचित्रको छायांकन इलाम र पाँचथर जिल्लाका विभिन्न स्थानहरूमा हुने बताइएको छ। चलचित्रमा पूर्वी पहाडको जीवनशैली, संस्कृति र सामाजिक यथार्थलाई आधार बनाइएको निर्देशक राईले जानकारी दिए । चलचित्रको लेखन समेत राई स्वयंले गरेका हुन् ।

चलचित्रमा धिरज मगर, मिरुना मगर, दिया पुन, सुनिल थापा, कविता आले, पुस्कर गुरुङ, अभयराज बराल, उदय सुब्बा, बुद्धि तामाङ, रजनी गुरुङ, विशाल लिम्बू,सुभाष सिंह ठकुरी लगायत कलाकारहरूको अभिनय रहनेछ ।

सौरभ लामाको छायाँकन रहने चलचित्रमा अनमोल गुरुङको संगीत, तोरेम्पा हाङ राईको संयोजन, राजेश पायल राई, अस्मिता अधिकारी, झुमा लिम्बू र अनमोल गुरुङको गायन रहने छ ।