रिलिज भयो ‘महाभोज’, देशभर २०० शो

लेन्सनेपाल २०८२ जेष्ठ ३०

चलचित्र ‘महाभोज’ आजदेखि प्रदर्शनमा आएको छ । दिनेश राउत निर्देशित चलचित्रले करिब २०० शो पाएको निर्माण पक्षले जनाएको छ । सहकारी ठगी प्रकरणलाई मुख्य बिषय बनाएको चलचित्रमा दयाहाङ राई, आर्यन सिग्देल, खगेन्द्र लामिछाने, अञ्जना बराइली, मलिका महत, गौमाया गुरुङ, मोहन निरौला, वसुन्धरा भुषाललगायतका कलाकारको अभिनय रहेको छ ।

काठमाडौंमा केही दिनअघि प्रिमियर भइसकेको ‘महाभोज’को हालै पोखरा र बुटवलमा पनि विशेष शो सम्पन्न भएको छ । यसै क्रममा बिहीबार एकै दिन विराटनगर र धरानमा पनि प्रिभ्यु शोहरू सम्पन्न भएका छन् । यी शोमा सहभागी दर्शकहरूले चलचित्रप्रति निकै उत्साह देखाएका छन् ।

प्रिभ्यु शोहरूमा समाजका प्रतिष्ठित व्यक्तिहरू, पत्रकारहरू, र केही सहकारी पीडितहरू पनि सहभागी थिए । विशेष गरी सहकारी पीडितहरूले यो चलचित्र सबैले हेरेर राज्यलाई व्यापक दबाब दिनुपर्ने प्रतिक्रिया दिएका छन् । उनीहरूले चलचित्रले यथार्थपरक चित्रण गरेको र न्यायका लागि आवाज उठाउन प्रेरित गर्ने बताए। ।

‘महाभोज’ क्लक वर्क क्रियशन र पिक्चर फ्रेमको संयुक्त प्रस्तुतिमा बनेको चलचित्रका निर्माता हिमाल कडरिया हुन् ।