कृषाको निर्देशनमा ‘जहाजैमा’ निर्माणको घोषणा, जापानी अभिनेत्रीको मुख्य भूमिका

लेन्सनेपाल २०८२ जेष्ठ २८

केही दिन अघि चलचित्र ‘पिताम्बर’ निर्देशन गर्ने पक्का गरेकी कृषा चौलागाईको निर्देशनमा बन्ने चलचित्र ‘जहाजैमा’मा को घोषणा गरिएको छ ।

चलचित्रको नाम सहितको थिम पोस्टर सार्वजनिक गर्दै निर्माणको घोषणा गरिएको हो । सार्वजनिक पोस्टरमा एक जना पुरुष जहाज चढ्नका लागि विमानस्थलमा लगेज बोकेर जाँदै गरेको देख्न सकिन्छ। निर्देशक चौलागाईंका अनुसार चलचित्रले जापान जाने सपना बोकेका युवाहरुको कथा भन्नेछ ।

यूएनए प्रोडक्सनको निर्माण रहने चलचित्रमा उज्ज्वल गुरागाईंको लगानी रहने छ । केही दिन जापान भ्रमणको क्रममै कृषाले चलचित्र निर्देशनको सम्झौता गरेकी थिइन । भदौबाट छायाँकन थालिने जनाइएको चलचित्रमा पुरुषोत्तम प्रधानको छायांकन रहनेछ ।

नेपाल, जापान र फिलिपिन्समा छायांकन गरिने चलचित्रमा नेपाल र जापानका कलाकारहरूको अभिनय रहने जनाइएको छ । चलचित्रमा जापानी अभिनेत्री रजेल इचिमियाको मुख्य भूमिका रहने जनाइए पनि अन्य कलाकारबारे केही खुलासा गरिएको छैन ।