एकपछि अर्को चलचित्र खेल्दै केदार घिमिरे, ‘जहाजैमा’मा अनुबन्धित

लेन्सनेपाल २०८२ आषाढ ११

दीपक–दीपा समूहबाट स्वतन्त्र रुपमा काम गर्न अनुमति पाएपछि केदार घिमिरे ‘माग्ने बुढा’ एकपछि अर्को चलचित्रमा व्यस्त हुन थालेका छन् । कुनै समय दीपक–दीपा समूहका चलचित्र मात्र खेल्ने घिमिरेले पछिल्लो एक वर्षमा मात्र ३ चलचित्रको छायाँकन सकाएका छन् ।

अहिले सम्मकै सार्वाधिक पारिश्रमिक लिएर ‘माग्ने राजा’को शिर्ष भूमिकामा काम गरेका उनले ‘जेरी अन टप’ र ‘माइतीघर’को छायाँकन पनि सकाएका छन् । अन्य चलचित्रमा कति पारिश्रमिक लिए भन्ने नखुलाइए पनि ‘माग्ने राजा’मा उनले ६१ लाख पारिश्रमिक लिएको जनाइएको छ । जुन नेपाली चलचित्रको इतिहासमै सवै भन्दा महङ्गो पारिश्रमिक हो ।

यसैबीच, उनी अर्को चलचित्र ‘जहाजैमा’मा पनि अनुबन्धित भएका छन् । निर्माता उज्ज्वल गुरागाईँ र केदारबीच लिखित सम्झौता भएको हो । कृषा चौलागाईको निर्देशन रहने चलचित्रमा केदारको मुख्य भूमिका रहने जनाइएको छ । यो चलचित्रमा उनले कति पारिश्रमिक लिए भन्ने चाँही खुलाइएको छैन ।

भदौबाट छायाँकन थालिने जनाइएको चलचित्रको हाल प्रि–प्रोडक्सनको काम चलिरहेको छ । चलचित्रमा यसअघि जापानी अभिनेत्री रुजेल इचिमिया अनुबन्धित भइसकेकी छन् ।

यूएनए प्रोडक्सनको व्यानरमा निर्माण हुन लागेको चलचित्रको छायांकन नेपाल, जापान र फिलिपिन्समा हुने जनाइएको छ ।