जितु अभिनित ‘ज्वाइँ साब’ पनि असोज २४ मै रिलिज हुने

लेन्सनेपाल २०८१ श्रावन २९

चलचित्र ‘ज्वाइँ साब’ दशैंको फूलपाती अर्थात असोज २४ गतेबाट प्रदर्शन आउने भएको छ । मंगलबार फर्स्टलुक पोस्टर सार्वजनिक गर्दै फूलपातीलाई प्रदर्शन मिति घोषणा गरिएको हो ।

यसअघि सोही मितिमा चलचित्र ‘छक्का पञ्जा ५’ले प्रदर्शन मिति घोषणा गरिसकेको छ । ‘छक्का पञ्जा’ सिरिजकै केही चलचित्रमा काम गरेका अभिनेता जितु नेपाल ‘ज्वाइँ साब’मा केन्द्रीय भूमिकामा छन् । यसले गर्दा एकै दिन यि दुई चलचित्र प्रदर्शन हुनुलाई संयोग मात्र मानिएको छैन ।

बसन्त को निर्देशन रहेको ‘ज्वाइँ साब’को पोस्टरमा जितु र अभिनेत्री नीति शाह बेहुला–बेहुलीको पहिरनमा देखिएका छन् भने कलाकारहरु बुद्धि तामाङ र हिमेश पन्तलाई पनि स्थान दिइएको छ । राजकुमार पण्डितको प्रस्तुति रहेको चलचिमा शिशिर वाङ्देल, प्रकाश घिमिरे, रमेश बुढाथोकी, निमा पाण्डे, शिवहरि वैरागी, राजेन्द्र नेपाली, कविता आले लगायतको पनि अभिनय छ । चलचित्रमा सविन अधिकारीको कथा, शंकर धितालको पटकथा तथा संवाद छ । चलचित्रमा विजय बस्याल कार्यकारी निर्माता र मीनादेवी खड्का, सौगात पण्डित र पदमलाल तामाङ निर्माता छन् ।