प्रदर्शन मिति घोषणा गर्दै ‘जिग्री’को पोस्टर सार्वजनिक

चलचित्र ‘जिग्री’को पोस्टर सार्वजनिक गर्दै रिलिज मिति पनि घोषणा गरिएको छ । सुस्केरा आर्ट्सको निर्माण तथा प्रस्तुति रहेको चलचित्र फागुन ४ गते रिलिज हुनेछ । निर्माण टिमले एउटा आलु जस्तो, अर्को तामा जस्तो ट्यागलाइन राख्दै चलचित्रको पोष्टर सार्वजनिक गरेको हो ।

कमेडी–क्राइम–एक्सन, ड्रामाको मिश्रण रहेको चलचित्रलाई आकाश मगरले निर्देशन गरेका हुन् । चलचित्रमा अभय राज बराल, आकाश मगर, सुशील राज पाण्डे, पशुपति राई, सुप्रिया राना, रोशन सुवेदी, जीवन बराल, वासुदेव खनाल, नवीन लम्साल, केदार श्रेष्ठ, दिवाकर घिमिरे, सुशीला लक्ष्मी महर्जन, मनिष व्याञ्जु, स्नेहा रसाइली, अर्जुन पौडेल, शंकर भण्डारी लगायतको अभिनय रहेको छ।

चलचित्र ‘जिग्री’ काठमाण्डौंमा अनेकन् महत्वकांक्षा बोकेर आएका फरक व्यवहार भएका दुई केटाको कथा हो । ती युवाहरूले महंगी र अभावमा पिल्सँदै काठमाण्डौंमा टिकेर बस्नका लागि गरेको सङ्घर्ष चलचित्रको मुख्य विषय बस्तु रहेको छ ।

चलचित्रका कार्यकारी निर्माता कुसुम थापा मगर र निर्माता कुमार श्रेष्ठ रहेका छन् । चलचित्रमा छायाङ्कन सुमित भट्ट र सोमित माझी, सम्पादन र कलर सरुन मानन्धर, ध्वनि परिकल्पना र मिश्रण किशोर आचार्य, प्रोडक्सन डिजाइन आकी थेक्पा, सङ्गीत सुवास पौडेल र भास्कर स्वाँर, कास्टिङ निर्देशक केदार श्रेष्ठ र भिएफएक्स लुज राजभण्डारीको रहेको छ ।