इन्डो–नेपाल फिल्म ‘मोना लिसा’ निर्माणको घोषणा

लेन्सनेपाल २०८२ असोज ६

इन्डो–नेपाल फिल्म ‘मोना लिसा (ब्लडी लभ) निर्माणको घोषणा गरिएको छ । घटस्थापनाको दिन पारेर बी एण्ड के इन्टरटेन्मेन्ट र अक्स इन्टरनेशनल स्टुडियोजको संयुक्त ब्यानरमा चलचित्र निर्माणको घोषणा गरिएको हो ।

दक्षिण भारतीय र नेपाली फिल्मकर्मी मिलेर चलचित्र निर्माण गर्न लागेका हुन् । नेपालमै तयार हुन लागेको फिल्मको टाइटल पोस्टर समेत सार्वजनिक गरिएको छ । फिल्म किङ योगीको लेखन तथा निर्देशनमा तयार हुनेछ ।

ठूलो बजेटमा निर्माण हुने भनिएको फिल्ममा भारतसहित विभिन्न देशका अनुभवी प्राविधिक टोली संलग्न हुने जानकारी अक्स इन्टरनेशनल स्टुडियोजले दिएको छ । यसअघि ठूला–ठूला अन्तर्राष्ट्रिय फिल्ममा काम गरिसकेका प्राविधिक समूह यसमा संलग्न हुने भएकाले प्राविधिक पक्ष बलियो रहने अपेक्षा गरिएको छ ।

हाल फिल्मको प्रारम्भिक तयारीसँगै कलाकार छनोट प्रक्रिया अगाडि बढिरहेको निर्माण पक्षले जनाएको छ । कथा, शैली र भिजुअलमा नवीनपन ल्याउने उद्देश्यसहित निर्माण हुन लागेको फिल्म २०२६ मा विश्वव्यापी रूपमा प्रदर्शन गर्ने योजना रहेको बताइएको छ ।