आर्यन र प्रदिपलाई लिएर चलचित्र बनाउँदै दिनेश !

निर्देशक दिनेश राउत र नायक आर्यन सिग्देलको दोस्ति निर्देशक र नायकको भन्दा निकै माथी छ । चलचित्रमा काम गर्नु पूर्व नै यि दुई मिल्ने साथी थिए । यसअर्थ यिनिहरु एक अर्काका निकै प्रिय मानिन्छन् । ‘नोभेम्बर रेन’को अफर आफुलाई आएपछि आर्यनले नै उक्त चलचित्रमा दिनेशलाई भित्राएका थिए ।

यता पछिल्लो समय अर्का नायक प्रदिप खड्का पनि दिनेशका प्रिय बनिरहेका छन् । प्रदिपले पनि आफुलाई अफर आएको एक बायोपिकको निर्देशनका लागि पहिलो पटक दिनेशसँग कुरा लिएर गएका थिए । भलै त्यो चलचित्र बनेन् । यद्यपी कुनै समय एकपछि अर्को चलचित्रमा आर्यनसँग काम गर्ने दिनेश अचेल एकपछि अर्को प्रोजेक्टमा प्रदिपसँग जोडिएका छन् । बायोपिक चलचित्र नबने पछि उनले प्रदिपलाई लिएर ‘प्रकाश’ बनाए । त्यसयता दिनेशले गरेका केही बिज्ञापनमा पनि प्रदिप छुटेका छैनन् ।

निर्देशकहरु हिरो खोज्दै हिडेको त धेरै सुन्यौं । यि दुई नायक भने निर्देशकको मा अफर लिएर गएका थिए । सायद यसैले पनि होला त्यसपछि दिनेशले उनीहरुसँग एकपछि अर्को प्रोजेक्टमा काम गरेको ।

यतिबेला भने बजारमा अर्को चर्चा छ । दिनेशले आर्यन र प्रदिप दुवैलाई लिएर चलचित्र बनाउँदै छन् रे । दुई नायकको मुख्य भुमिका रहने चलचित्रको तयारी पनि भित्र भित्र चलिरहेको छ रे । तर, यसबारेमा बोल्न टिमका कोही पनि तयार छैनन् । निर्देशक राउत आफु यतिबेला चलचित्र ‘प्रकाश’को पोष्टमा ब्यस्त रहेको बताउँछन् । आर्यन म्युजिक भिडियोमा ब्यस्त छन् त प्रदिप यतिबेला मुम्बईमा छन् । यद्यपी उनीहरुले भित्र भित्र तयारी तिब्र रुपमा गरिरहेको बुझिएको छ । यति सम्मकी टिममा आवद्ध सबैलाई कुनै पनि खबर मिडियामा नचुहाउनु भन्ने कडा निर्देशन छ रे । अब राम्रो काम गर्नेहरुको टिमअप हुनु नराम्रो हुँदै होइन । तर, खबरलाई सक्दो गोप्य चाँही किन राखेका होलान !