निर्देशनमा डेब्यु गर्दै बल्छी धुर्बे

लेन्सनेपाल २०८२ आषाढ १७

‘बल्छी धुर्बे’ नामले सानोपर्दामा चर्चित कलाकार मरिचमान श्रेष्ठले चलचित्र निर्देशनमा डेब्यु गर्ने भएका छन् । श्रेष्ठकै निर्माण रहने चलचित्र ‘गोबर गणेश’लाई उनी आफैले निर्देशन गर्ने भएका हुन् ।

बल्छीधुर्बे फिल्मस् प्रालिको ब्यानरमा बन्ने चलचित्रका लागि केही दिन अगाडि चलचित्र विकास बोर्डबाट निर्माण इजाजत लिइएको छ । जसमा सीतादेवी तिमल्सिना र पूजन घिमिरे कलाकारका रुपमा रहने उल्लेख छ । यद्यपी चलचित्रमा वर्षा सिवाकोटी, पदम तामाङ, सन्तोष बानिया, माओत्से गुरुङलगायतको अभिनय रहने जनाइएको छ ।

२ करोडको लागतमा निर्माण हुने भनिएको चलचित्रलाई माघ १ गते रिलिज गर्ने निर्माण पक्षले जनाएको छ । चलचित्र कमेडी जनरामा निर्माण हुनेछ ।