४५ दिनमा सकियो ‘एक्टर’को छायांकन

लेन्सनेपाल २०८१ श्रावन २

चलचित्र ‘एक्टर’को छायांकन सम्पन्न भएको छ । गत बैशाख महिनाको अन्त्यतिरबाट सुरु गरिएको छायाँकन दुई चरण गरी कुल ४५ दिनमा पुरा भएको हो ।

पोखरामा १० दिन खिचेपछि काठमाडौंमा ३५ दिन छायांकन गरिएसँगै चलचित्रको एउटा गीत खिच्न बाँकी राख्दै सम्पूर्ण छायांकन सकिएको निर्माता थमन कुमार भण्डारीले जानकारी दिए ।

राजन भुसालको डेब्यु निर्देशनमा छायाँकन भएको चलचित्रमा प्रदीप खड्का, दिव्या रायमाझी, राजबल्लभ कोइराला, आना शर्मा, सुशील सिटौला, दिव्य देव, उषा रजक, प्रदीप चौधरी ुपिकेु, बादल भट्ट, अनोज पाण्डे, सुप्रज्ञा शर्मा, सिर्जना अधिकारीलगायतको अभिनय रहेको छ ।

अदृत फिल्मस्को प्रस्तुतिमा मोती फिल्मस्को निर्माण रहेको चलचित्रमा एनिस भुसाल सह(निर्माता र मोती कार्की क्रियटिभ प्रोड्युसर हुन् । चलचित्रका छायाँकार नरेन्द्र मैनाली हुन् । चलचित्र यस वर्षको तिहारको अवसर पारेर कात्तिक १५ गते लक्ष्मीपूजामा रिलिज हुने छ । चलचित्रको जापान प्रदर्शन अधिकार समेत बिक्री भएको छ। ‘एक्टर’को जापान राइट्स खेम राज शाहको म्याक्स इटरटेन्टमेन्टले खरिद गरिसकेको छ ।