कान्सको मार्केटमा स्टल राख्दै नेपाली चलचित्र ‘एक्लो’

विश्व प्रतिष्ठित कान्स फिल्म फेस्टिभलको ७८ औं संस्करण अन्र्तगत प्रोड्युसर्स नेटवर्कमा छानिएका निर्देशक प्रदिप शाही आइतबार फ्रान्सको राजधानी पेरिस पुगेका छन् ।

मंगलबार अर्थात मे १३ देखि २४ तारिखसम्म फ्रान्सको दक्षिणी सहर कान्समा आयोजना हुने फेष्टिवलमा शाहीले आफु निर्देशित चलचित्र ‘एक्लो’को स्टल राख्ने भएका छन् । चलचित्रको टिमले कान्सको मार्केटमा अन्तर्राष्ट्रिय वितरकहरुलाई टिजर र छायांकनका दृश्य देखाउँदै विश्वव्यापी वितरणबारे मार्केटिङ गर्नेछ । सम्भवतः यो फेस्टिभलमा स्टल राख्ने पहिलो नेपाली चलचित्र ‘एक्लो’ हो ।

स्टलमा नेपालको झन्डा समेत राख्ने तयारी छ । निर्देशक शाही भने –  ‘हामीले यस वर्षको कान्समार्फत नेपाल र एक्लोलाई कनेक्ट गर्न खोजेका छौँ ।’ कान्स सुरु हुनुअघि नै ७ अन्तर्राष्ट्रिय वितरकले चलचित्रबारे रुचि राखेको निर्देशक शाहीले बताए । उनका अनुसार, वेबसाइटमा जानकारी हेरेर ४ अमेरिकी, २ जापानी र एक भारतीय वितरण कम्पनीले प्रस्ताव राखेका छन् । निर्देशक शाही सँगै कान्स मार्केटमा निर्माताहरू रितेश राना, संगीता श्रेष्ठ, भाइराजा थापा, राजु गुरुङ, उत्सव विष्ट र बजारीकरण प्रमुखको रुपमा चपलचित्रकी अपरेटिभ डिरेक्टर रिश्ता कार्की सहभागी हुनेछन् । 

चलचित्रमा प्रदीप खड्का, विजय लामा, सुनिल थापा, दिया पुन, बेनिशा हमाल, दिनेश डीसी, कविता नेपाली लगायतको अभिनय छ । बेलायती कलाकार जेमी बेकन पनि महत्त्वपूर्ण रोलमा छन् ।