ए मेरो हजुर ३ को पोष्टर सार्वजनिक, अनमोल र सुहानाको मुख्य भुमिका

लेन्सनेपाल २०७५ असोज २६

दोस्रो पुस्ताका कलाकारहरुको मुख्य भुमिका रहने चलचित्र ए मेरो हजुर ३ को अफिसियल पोष्टर सार्वजनिक गरिएको छ । शुक्रबार बाट औपचारिक रुपमा चलचित्रको छायाँकन आरम्भसँगै दुई वटा पोष्टर सार्वजनिक गरिएको हो । पोष्टरमा चलचित्रका मुख्य कलाकारहरु अनमोल केसी र सुहाना थापालाई प्रस्तुत गरिएको छ ।

अनमोल चर्चित अभिनेता भुवन केसी र अभिनेत्री सुस्मिता केसीका छोरा हुन भने सुहाना निर्माता सुनिलकुमार थापा र अभिनेत्री तथा निर्देशक झरना थापाकी छोरी हुन । पोष्टरमा यि दुईलाई रोमान्टिक मुडमा देखाइएको छ ।

चैत २९ गतेलाई प्रदर्शन मिति घोषणा गरिएको चलचित्रलाई झरना थापाले निर्देशन गर्नेछिन । म्युजिकल लभस्टोरी जनरामा बन्ने यो चलचित्रमा अनमोल र सुहानाका अलवा सलोन बस्नेत, अर्पण थापा, रबिन्द्र झालगायतका कलाकारहरुको पनि अभिनय रहनेछ ।

सुनिल कुमार थापाको निर्माण रहने चलचित्रमा निर्देशक थापा र सुमन पौडेलको कथा, कल्याण सिंह, प्रतिक पौडेल र आशिश अविरलको संगीत, रोशन श्रेष्ठले द्वन्द्व र सञ्जय लामाको छायाँकन रहने छ ।