कलाकार परिवर्तनका कारण शुरुबाटै शुरु भयो ‘२ नम्बरी’को छायाँकन

लेन्सनेपाल २०७९ बैशाख ५

कोरोनाका कारण छायाँकन बिचैमा रोक्नु परेको चलचित्र ‘२ नम्बरी’को पुनः छायाँकन शुरु भएको छ । दुई वर्ष भन्दा लामो समयपछि पुनः छायाँकन थालिएको चलत्रित्रको शुरुबाट नै छायाँकन थालिएको हो ।

यसअघि मुख्य भुमिकामा काम गरेका कलाकारहरु परिवर्तन भएसँगै चलचित्रको छायाँकन शुरुबाटै गर्नु परेको हो । चलचित्रका मुख्य नायक पल शाह बलात्कार आरोपमा पुर्पक्षका लागि तनहुँ कारागारमा छन् भने जयनन्द लामाको निधन भइसकेको छ । यस्तै अभिनेत्री वर्षा राउतले सेड्युल नमिलेको भन्दै चलचित्र छोडेकी छिन । जसका कारण चलचित्रमा सौगात मल्ल, उपासना सिंह ठकुरी र कविता आलेको प्रवेश भएको छ । दयाहाङ राई र उगेन छोदेन भने यथावत छन् । कलाकार परिवर्तनसँगै कथामा पनि केही परिवर्तन गरिएको बुझिएको छ ।

कास्कीको ल्वाङ गाउँदेखि सुरु भएको छायाँकन दुई सातासम्म सोही गाँउमा जारी रहने र त्यसपछि पोखरा आसपासका क्षेत्रमा छायाँकन गरिने जनाइएको छ । कार्तिक ४ गतेका लागि प्रदर्शन मिति तय गरिएको चलचित्रका प्रस्तुतकर्ता किरण नेपाली हुन् ।

मित्रताको कथा प्रस्तुत गर्ने चलचित्रमा गण्डकी प्रदेशका युवा तथा खेलकुदमन्त्री राजीव गुरुङ र अमलादेवी राईको लगानी छ । चलचित्रका कार्यकारी निर्माता सरोज नेपाली हुन् ।