एलिस र प्रतापलाई लिएर प्रदिपले खडा गरे आफ्नै टिम !

प्रदिप खड्का पछिल्लो समयका चल्तिका नायक । अहिले प्रदिपको नामले मात्र पनि चलचित्रको इनिसियल व्यापारमा निकै ठुलो भुमिका खेल्छ । उनलाई दर्शकहरुले पनि विश्वास गरिरहेका छन् ।

प्रदिप दर्शकको विश्वास नतोड्ने बताउँन पछि पर्दैनन् त कहिले काँही भने रिक्स लिनु पर्छ पनि भन्छन् । यिनै अभिनेताले आन्तरिक रुपमा आफ्नो एउटा टिम नै खडा गरेका छन् ।

प्रेमगीतबाट चर्चामा आएका प्रदिपले प्रेमगीत २ पछि लगातार रुपमा संगीतकार एलिस कार्की र गायक प्रताप दासको साथ छोडेका छैनन ।

एलिस कार्की पाश्र्वसंगीतमा स्थापित नाम हो तर संगीतकारको रुपमा भने प्रेमगीत २ बाट चर्चामा आए । प्रेमगीत २ को मोटरसाइकलमा बोलको गीत चल्यो । त्यसपछि उनले लिलिबिलि र रोजमा एक–एक गीतमा संगीत दिए । एलिसका सबै गीतमा प्रदिप फिचर्ड थिए । गीतहरु पनि रुचाइए । अनि एलिसले संगीत दिएका ३ वटै चलचित्रका गीतलाई प्रताप दासले गाएका थिए । प्रतापले यसअघि पनि केही चलचित्रका गीतहरु नगाएका होइनन् । तर, नेपाल आइडल पछि उनी चर्चामा आए । यसअर्थ उनको नामले पनि पछिल्लो समय लिलिबिलि र रोजको गीतलाई कहिँ कतै फाइदै भएको छ । त्यसो त प्रतापले केही समय एलिसँगै रहेर पाश्र्वसंगीतमा काम समेत गरेका थिए ।

अब यो टिम लभ स्टेशन नामक चलचित्रमा पनि दोहोरिदै छ । प्रदिप समेत निर्माता रहेको यो चलचित्रमा पनि एलिसको संगीत र प्रतापको स्वर रहने छ । केही दिन अघि लभ स्टेशनको जानकारी दिन बोलाइएको एक कार्यक्रममा हामीले प्रदिपसँग एलिस र प्रतापलाई सँगै लिएर हिड्नुको कारण जान्न खोज्यौं । उनले आफ्नो सिग्नेचर मुस्कानका साथ प्रतापको स्वर आफुमा म्याच भएको बताए । अनि एलिसको बारेमा कुरा गर्दा उनको कामको तारिफ गरे । प्रदिपले भने – ‘मैले जबरजस्ति उसैको संगीत हुनुपर्छ भनेको छैन अहिले सम्म । एउटा मेहनती संगीतकारको गीत मेरो चलचित्रमा राख्दा उसलाई पनि फाइदा हुन्छ । गीत राम्रो बनेको छ अनि टिमलाई चित्त बुझ्यो भने मात्र समावेश गर्ने हो ।’