दिनेश डिसीको निर्देशनमा ‘सर्वजित’ बन्ने

लेन्सनेपाल २०७९ जेष्ठ २२
दिनेश डिसीको निर्देशनमा ‘सर्वजित’ बन्ने

नेपालमा राजनीतिक दलहरुले संगठन सुरु गर्नुभन्दा अघि नै संगठन विस्तार गर्ने राजनैतिक सोच बनाएका दलित आन्दोलनका अभियन्ता भगत सर्वजित विश्वकर्माको बायोपिक फिल्म ‘सर्वजित’को घोषणा गरिएको छ । भगत सर्वजित विश्वकमा प्रतिष्ठानको स्वीकृतिमा दलित महिला केन्द्रले यो फिल्म निर्माण गर्न लागेको हो ।

प्रधानमन्त्री निवास बालुवाटारमा शनिबार आयोजित एक विशेष समारोहमा प्रधानमन्त्री शेरबहादुर देउवाले फिल्मको मुहुर्त गरे । फिल्मको निर्देशन दिनेश डिसीले गर्नेछन् । करिब एक करोड २५ लाखको लागतमा निर्माण हुने यो फिल्म जातीय भेदभाव तथा छुवाछुत उन्मुलन दिवसको अवसर पारेर मुहुर्त गरिएको हो ।

कार्यक्रममा संस्कृति तथा पर्यटनमन्त्री प्रेमकुमार आलेले फिल्म निर्माणमा आफूले पार्टीको लेबी कटाएर पाँच महिनाको तलब सहयोग गर्ने घोषणा गरे ।

बाग्लुङ, पाल्पा, पोखरा, काठमाडौं र भारतको बनारसमा छायांकन हुने फिल्ममा एनबी महर्जनको द्वन्द्व, एलिश कार्कीको पाश्र्व संगीत, मोहन निरौलाको संवाद, सौरभ लामाको छायांकन, जनक खड्काको पटकथा, नहकुल खड्काको सम्पादन, रमेशमान श्रेष्ठको एनिमेसन र अनन्त घिमिरेको भीएफएक्स तथा कलर करेक्सन हुनेछ । निर्माण पक्षका अनुसार फिल्मका लागि कलाकार छनोट चरणमा छन् ।