बालकलाकार केसीकाे कुपोषणका कारण निधन

लेन्सनेपाल २०८१ चैत्र २०

चलचित्र ‘लाज शरणम्’मा कुपोषित बालकको भूमिकामा अभिनय गरेका कलाकार विकास केसीको कुपोषणकै कारण मृत्यु भएको छ ।
केसीको जाजरकोटस्थित घरमै चैत १९ गते निधन भएको हो । वि.सं. २०६६ साउन १ मा जन्मिएका केसीको १५ वर्षको अल्पआयुमै निधन भएको हो ।

चलचित्रमा कुपोषित र कर्णाली क्षेत्रकै बालकको चरित्रमा देखिएका केसी वास्तवमै कुपोषित र कर्णाली क्षेत्रका बासिन्दा थिए। उनलाई चलचित्रको छायाङ्कनपछि जटिल कुपोषणको उपचारका लागि काठमाडौंको ग्रिन सिटी अस्पताल ल्याइएको थियो । तर, त्यहाँ उपचार सम्भव नभएपछि कान्ति बाल अस्पतालमा पठाइए पनि त्यहाँबाट पनि उनलाई फर्काइएको थियो ।

चलचित्रका निर्देशक तथा कलाकारहरुले केसीको निधन प्रति गहिरो दुःख ब्यक्त गरेका छन् । निर्देशक कुमार कट्टेलले सामाजिक सञ्जालमा लेखेका छन् –
‘कुपोषणबाट नेपालमा अझै बालबालिकाले ज्यान गुमाइरहेका छन्। विकासको मृत्युले हामीलाई स्तब्ध बनाएको छ। कर्णालीको कष्टकर जीवन र बाल मृत्युदरप्रति सरकारको ध्यान जाओस् ।’ उनले चलचित्र मार्फत कर्णालीको वास्तविकता उजागर गर्न खोजिएको पनि जनाएका छन् ।

कर्णालीमा अझै पनि ५० हजार बालबालिका कुपोषणबाट पीडित रहेको अनुमान गरिएको छ ।