नीताले ‘सुख दुःख’अघि ‘पार्वती’ बनाउने

लेन्सनेपाल २०८२ श्रावन २६

अभिनेत्री नीता ढुंगानाले चलचित्र ‘सुख दुःख’ अघि अर्को चलचित्र ‘पार्वती’ बनाउने भएकी छिन । यसअघि ‘सुख दुःख’को घोषणा सँगै कलाकार तथा प्राबिधिक छनौटलाई तिब्रता दिएकी नीताले शनिबार भने चलचित्र ‘पार्वती’ निर्माणको घोषणा गरेकी हुन् ।

नीताले दुईवटा पोस्टर सार्वजनिक गर्दै माघ १ गतेलाई प्रदर्शन मिति समेत तोकेकी छिन । नीताकै निर्देशन रहने चलचित्रको सार्वजनिक पोस्टरमा उनी आफैं चित्रित छिन् । एउटामा उनी पहेँलो छातामुनि गम्भीर मुद्रामा घाँटीमा सिठी र पानीको बोतल झुन्ड्याएको अवस्थामा देखिएकी छन् । दोस्रो पोस्टरमा भने उनी हल्का मुस्कान र लजालु अदा सहित प्रस्तुत भएकी छन् । उनको हाउभाउ हेर्दा चलचित्रमा उनले ‘अटिजम’ भएको युवतीको भूमिकामा अभिनय गर्न लागेको हुनसक्ने देखिन्छ ।

नीताकै कथा रहेको चलचित्रमा पटकथा तथा संवाद शिवम् अधिकारीको रहने छ । कविर लाल र शाहिद लालले छायांकन गर्ने चलचित्रमा सानिजा अधिकारी, नरसरी अधिकारी र पवन ढुंगाना निर्माता रहेका छन् ।

निर्माण पक्षका अनुसार, ‘पार्वती’ हास्यसर सहितको भावनात्मक र सामाजिक सन्देश मिसिएको कथा हो । जसमा एक साधारण पात्रको नजरबाट जीवनका रंग, सम्बन्धका मिठास र संघर्षका भाव दर्शाइनेछ । असोजबाट चलचित्रको छायाँकन थालिने जनाइएको छ ।