‘सकम्बरी’बाट चलचित्रमा कमब्याक गर्दै जीवन, अर्पण पनि अनुबन्धित

लेन्सनेपाल २०८२ भाद्र ४

अभिनेता जीवन लुइँटेलले ७ वर्षपछि चलचित्र अभिनयमा कमब्याक गर्ने पक्का भएको छ । जीवनले चलचित्र ‘सकम्बरी’ मार्फत कमब्याक गर्न लागेका हुन् ।

कान्तिपुर फिल्म एकेडेमीले निर्माण गर्न लागेको चलचित्रका लागि बुधबार जीवनसँग लिखित सम्झौता भएको हो । यस्तै बुधबार नै अर्का अभिनेता अर्पण थापालाई पनि चलचित्रमा अनुबन्धिन गर्दै पनि एकेडेमीले लिखित सम्झौता गरेको छ ।

एकेडेमीले सामाजिक सञ्जालमा सम्झौताका तस्विर साझा गर्दै ‘सकम्बरी’मा जीवनले सुयोगवीर र अर्पणले शिवराजको चरित्र निर्वाह गर्ने जनाएको छ ।

चलचित्रलाई कसले निर्देशन गर्दै छ भन्ने कुरा अझै खुलाइएको छैन । एकेडेमीका सीइओ प्रकाश पुरीले चलचित्रको शिर्ष भूमिका सकम्बरी र निर्देशक बारे केही दिनमा जानकारी दिइने जनाए । चलचित्र पारिजातको चर्चित पुस्तक ‘शिरीषको फूल’का पात्रबाट प्रभावित भएपनि कथा भने पुस्तकमा आधारित नरहेको पुरीले बताए ।

तिहारपछि छायाँकन गरिने चलचित्रमा दोस्रो विश्वयुद्ध कालखण्डको परिवेश समावेश गर्नु पर्निे भएकाले बर्मा र नेपालमा छायांकन हुने जनाइएको छ ।