बाहिरी ब्यानरका चलचित्रमा अभिनय गर्दै दिपाश्री, ‘पार्वती’मा अनुबन्धित

लेन्सनेपाल २०८२ श्रावन २९

यतिबेला ‘झरीपछिको इन्द्रेणी’ चलचित्रको छायांकनमा व्यस्त अभिनेत्री दीपाश्री निरौला अर्को चलचित्र ‘पार्वती’मा अनुबन्धित भएकी छिन । अभिनेत्री नीता ढुंगानाको निर्देशनमा बन्ने चलचित्रका लागि दुवै पक्षबीच लिखित सम्झौता भएको हो ।

बुझ्नमा आए अनुसार आमा सरस्वती मूभिजको ब्यानरमा बन्ने ‘दिपक–दिपा’को आगामी चलचित्रको निर्देशकका रुपमा दिपाश्री नरहने भएपछि उनले बाहिरी ब्यानरका चलचित्रमा काम गर्न थालेकी हुन् । त्यसो त होम प्रोडक्सनका चलचित्रमा निर्देशनको जिम्मेवारी सम्हाल्दै आएकी दिपाश्रीले बाहिरी ब्यानरका चलचित्रमा भने अभिनय गर्न लागेकी हुन् ।

नीता स्वयंले मुख्य भूमिकामा अभिनय गर्न लागेको चलचित्र ‘पार्वती’ असोजदेखि छायांकन जाने जनाइएको छ । ‘कार्टुन्ज क्रू’का सरोज अधिकारी सहायक निर्देशक रहेको चलचित्रको प्रदर्शन मिति माघ १ गतेलाई तोकिएको छ ।

नीता फिल्म्सको ब्यानरमा निर्माण हुने चलचित्रमा नीताकै कथा, शिवम् अधिकारीको पटकथा तथा संवाद र कवीर लाल र शाहिद लालको छायाँकन रहने छ । चलचिमा सावित्रा अधिकारी, नरहरी अधिकारी र पवन ढुंगानाको लगानी रहने जनाइएको छ ।