‘माइतीघर’ अभिनेता सीपी लोहनीको निधन

लेन्सनेपाल २०८१ बैशाख १७

अभिनेता सीपी लोहनीको निधन भएको छ । चितम्बरमप्रसाद लोहनी वास्तविक नामका अभिनेताको ८६ वर्षको उमेरमा सोमबार दिउसो १ः३० बजे निधन भएको हो । अल्जाइमर्स पीडित उनको उपचारको क्रममा काठमाडौंको माइतीघरस्थित अन्नपूर्ण न्युरो अस्पतालमा निधन भएको हो ।

लोहनीको पार्थिव शरीरलाई सोमबार अपरान्ह ४ बजे पशुपति आर्यघाटमा अन्त्येष्टि गरिने कलाकार संघका अध्यक्ष मोहन निरौलाले जनाएका छन् ।

निजी क्षेत्रले निर्माण गरेको पहिलो चलचित्र ‘माइतीघर’का अभिनेता लोहनी गायक समेत थिए । रेडियो नेपालमा केही गीत रेकर्ड गरेका उनले ‘माइतीघर’का गीतमा समेत स्वर दिएका छन् ।

नेपालीसहित हिन्दी र बंगाली चलचित्र क्षेत्रकी चर्चित अभिनेत्री माला सिन्हासँग उनको प्रेम विवाह भएको थियो ।