चलचित्र पाइरेसीको आरोप लागेका परियार पक्राउ

बिभिन्न चलचित्रको पाइरेसी गरेको आरोपमा लमजुङको बेशीसहरका सुजन परियार पक्राउ परेका छन् । ओटिटी प्लेटफर्ममा प्रदर्शनका लागि राखिएका बिभिन्न चलचित्रहरु पाइरेसी गरि अन्य सञ्जालहरुमा सार्वजनिक गरेका परियारलाई प्रहरीले मंगलबार सार्वजनिक गरेको हो ।

मंगलबार चलचित्र विकास बोर्डमा आयोजित पत्रकार सम्मेलनमा ‘डमरुको डन्डीबियो’ र ‘सरौतो’ लगायतका चलचित्र इन्टरनेटमा पाइरेसी गरेको आरोप लागेका २५ बर्षे युवकलाई प्रहरीले केहीदिन पहिले पक्राउ गरेको जानकारी दिइएको छ ।

परियारले ‘चलचित्र घर गोल्ड’ एपबाट अनाधिकृतरुपमा चलचित्र पाइरेसी गरेर टेलिग्राम एपमा अपलोड गरेको जनाइएको छ । अभिनेता खगेन्द्र लामिछाने र सागर खरेलको टिमले चलचित्र घर गोल्ड केही समय पहिले संचालनमा ल्याएको थियो । एप संचालक खरेलले कानुन बमोजिम कार्वाही हुने ढंगले परियारविरुद्ध मुद्दा चलाइने बताए । अभिनेता लामिछानेले पाइरेसीका कारण चलचित्र उद्योग मारमा परेको बताउँदै पशुपतिप्रसाद पाइरेसीको पीडा अहिलेसम्म भोगिरहेको सम्झिए ।

पत्रकार सम्मेलनमा अभियुक्तलाई उपस्थित नगराई प्रहरीका प्रतिनिधिले तस्विर र जानकारी मात्रै सार्वजनिक गरेका थिए । परियारलाई महानगरीय अपराध महाशाखाले पक्राउ गरि टेकुस्थित महानगरीय प्रहरी परिसरमा राखेको छ । परियारविरुद्ध इन्टरनेटमा अनाधिकृतरुपमा चलचित्र पाइरेसी गरेको आरोप लगाइएको छ ।