१७ दिनमा ‘छ माया छपक्कै’को व्यापार १२ करोड

लेन्सनेपाल २०७६ कार्तिक १४

बक्स अफिसमा दबदबा कायम राखेको चलचित्र ‘छ माया छपक्कै’ले १२ करोडको व्यापार गरेको छ । प्रदर्शन भएको १७ दिनमा १२ करोडको व्यापार गरेको हो ।

निर्माता रोहित अधिकारीले सामाजिक सञ्जाल फेसबुकमा स्टाटस् लेख्दै १५ करोडको व्यापार गर्ने अनुमन समेत गरेका छन् । चलचित्रको नाम र व्यापार भन्ने कुरा कतै उल्लेख नभए पनि रोहितको उक्त स्टाटस् ‘छ माया छपक्कै’को व्यापार सम्बन्धि हो भनेर बुझ्न गाह्रो छैन । उनले लेखेका छन् – ‘जे होस १२ पुग्न १७ दिन लाग्यो अन्तिम बिन्दु १५ सम्म पुग्ने अनुमान...’

दिपेन्द्र लामा निर्देशित चलचित्र असोज २४ गतेबाट प्रदर्शनमा आएको थियो । अहिले पनि मल्टिप्लेक्सहरुमा चलचित्रलाई प्राप्त शोहरु हाउसफुल भइरहेका छन् । तिहारको बिदामा चलचित्रले निकै आक्रामक व्यापार समेत गरेको छ ।

चलचित्रमा दिपकराज गिरी, ककी अधिकारी, केदार घिमिरे, जितु नेपाललगायतका कलाकारको अभिनय रहेको छ ।

पानी भित्र घुसेको राजनीति र राजनीति भित्र मौलाएको प्रेमलाई मुख्य विषय बनाइएको चलचित्रले दर्शक र समिक्षक दुबैबाट सकारात्मक प्रतिक्रिया पाएको छ ।