‘पूर्ण बहादुरको सारङ्गी’को अफरः बुवाको संघर्षलाई नगद पुरस्कार !

लेन्सनेपाल २०८१ असोज १४

चलचित्र ‘पूर्ण बहादुरको सारङ्गी’ले भिडियो प्रतियोगिताको घोषणा गरेको छ । निर्माण टिमले ‘मेरो बाको संघर्ष’ शिर्षकमा बुवाको संघर्ष र महत्वबारे भिडियो प्रतियोगिता आयोजना गरेको हो ।

प्रतिस्पर्धामा सहभागी आफ्नो बुवाको संघर्षको बयान गर्दै अधिकतम ३ मिनेटसम्मको भिडियो बनाएर पठाउनुपर्नेछ । आफुले बनाएको भिडियो आफुलाई सहज लाग्ने माध्यम जस्तै छोटो कथा, कविता, धन्यवाद ज्ञापन, चिठ्ठी, मनोवाद, आदि बाट प्रस्तुत गर्न सक्नेछन् ।

विजेताले ५० हजार रुपैयाँ पुरस्कार पाउने निर्माण टिमले जनाएको छ । यस्तै, दोस्रो हुनेले ३० हजार र तेस्रो हुनेले २० हजार रुपैयाँ प्राप्त गर्नेछन । नगद पुरस्कार बाहेक उत्कृष्ट भिडियो बनाएर पठाउने २० जनाले चलचित्रको २–२ वटा टिकट पाउनेछन् । सहभागीहरुले भिडियो कार्तिक ८ गतेसम्म बनाएर पठाइसक्नुपर्नेछ ।

सरोज पौडेलको लेखन तथा निर्देशन रहेको चलचित्र कात्तिक १५ गते रिलिज हुँदैछ । चलचित्रमा बिजय बराल, प्रकाश सपूत, मुकुन भुसाल, बुद्धि तामाङ, अञ्जना बराइली, माओत्से गुरुङ, देशभक्त खनाल, भोलाराज सापकोटा, विनोद न्यौपाने, अलिसा बास्तोला, स्वायम् केसी, जान्वी पौडेललगायतको अभिनय छ ।

सेभेन सिज सिनेमा र बाँसुरी फिल्मसको प्रस्तुति रहेको चलचित्रको निर्माता विनोद पौडेल र प्याट्रिक सुवेदी निर्माता हुन् ।