शुक्रबारबाट सञ्चालनमा आउदै विश्वज्योति हल

लेन्सनेपाल २०७९ जेष्ठ ३

कुनै समयको चर्चित विश्वज्योति हल नयाँ स्वरुपमा सञ्चालनमा आउने भएको छ । जमलस्थित विश्वज्योति हल मल्टिप्लेक्स स्वरुपमा सञ्चालनमा आउन लागेको हो । शुक्रवारबाट सञ्चालनमा आउने उक्त हलको मंगलवार कलाकार द्वय मदनकृष्ण श्रेष्ठ र हरिवंश आचार्यले उद्घाटन गरे ।

२०१३ सालमा स्थापना भएको यो हल कुनै बेला निर्मातालाई सर्वाधिक शेयर दिने हलका रुपमा परिचित थियो । यो हलमा चलचित्र चलाउन निर्माताहरु क्यू मै बस्ने गर्थे ।

पुरानो हल भएको आडमै खडा भएको पाँच तले विश्वज्योति मलको माथिल्लो तल्लमा दुई अडिटोरियमको विश्वज्योति सिनेमाज् खुलेको हो । हलको एउटा अडिटोरियममा २०१ र अर्को अडिटोरियममा ८९ सिट संख्या रहेको विश्वज्योतिका अध्यक्ष मोहन सरार्फले बताए । शुक्रवारबाट ‘लक्का जवान’, ‘डक्टर स्ट्रेन्ज २’ लगायतका फिल्म प्रदर्शन गर्दै हल औपचारिक रुपमा खुल्नेछ ।