‘अञ्जिला’को गीत ‘रात किन हुन्छ हजुर’ सार्वजनिक

लेन्सनेपाल २०८१ चैत्र १

प्रदर्शनरत् चलचित्र ‘अञ्जिला’को गीत ‘रात किन हुन्छ हजुर’ सार्वजनिक गरिएको छ । पीडायुक्त शब्दहरू रहेको गीतले चलचित्रकी प्रमुख पात्र एन्जिला तुम्बापो सुब्बाको जीवन गाथाका केही अंशहरू बयान गरेको छ ।

गीतमा थानेश्वर गौतम र शान्तिश्री परियारको स्वर रहेको छ भने थानेश्वरको सङ्गीत र प्रभा बर्तौलाको शब्द रचना रहेको छ । गीतको संक्षिप्त अंश चलचित्रमा समेत सुन्न सकिन्छ । चलचित्रका निर्देशक मिलन चाम्सले दर्शकबाट गीतको पुरा अंश मागभएपछि सार्वजनिक गरिएको बताए ।

फागु पूर्णिमाको अवसर पार्दै बिहीबार रिलिज भएको चलचित्रले दर्शकबाट सकारात्मक प्रतिक्रिया प्राप्त गरेको छ । ‘अञ्जिला’ नेपाली महिला राष्ट्रिय फुटबल टिमकी कप्तान एन्जिला तुम्बापो सुब्बाको जीवनीमा आधारित छ, जसमा एन्जिला आफैँले प्रमुख भूमिकामा अभिनय गरेकी छन् । चलचित्रमा एन्जिलाको साथमा सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङ लगायतका कलाकारको अभिनय रहेको छ ।